Kam ka HNLC ba pynbthei bom IED ha jaka trei ka Dhar Company bym siew ïa ka pisa ba dawa, ïap uwei

Shillong, Nohprah 18 : Ka sengkiengatiar ba la shah kheiñ be-ain ha ka sorkar pdeng ka Hynniewtrep National Liberation Council (HNLC) ka la kam ba ka la pynbthei bomb IED ha ka jaka treikam ka Dhar Company kaba don ha Shymplong, kaba hap ha Elaka Narpuh bad ha kane ka jingjia, uwei u briew ula iap.
Ka HNLC ka la kam ruh ba kane ka jingpynbthei bomb IED ka dei kaba la thmu ïa ki nongkynti jong u Symbud Myntri Rangbah ka Jylla u Ma Sniawbhalang Dhar namar ka jingkyntait ban siew ïa ka pisa ba dawa ka seng.
Kat kum ka kyrwoh ba phah da u General Secretary ka HNLC u Bah Sainkupar Nongtraw, kane ka jingjia kala jia ha ka step 15 tarik Nohprah ha ka por kumba 1 baje mynstep.
Ka HNLC ka kynnoh ruh ba ïa kane ka jingjia la pyrshang ban buhrieh na ki lad pathai khubor hynrei tang ki trai shnong ki tip bha ïa kaei kaba jia.
U Bah Sainkupar u ïathuh ba ka jingbthei bomb ka long kaba la jubor bha ha kaba bun tylli ki kali ka Dhar Company kila julor bad uwei u briew ula iap.
“Ngi kam ïa ka jingdonkti halor kane ka jingjia bad ngi kwah ban pynpaw ïa ka jingsngewlem naduh ka mynsiem ïa ka longïing jong u briew ba iap” ula ong haba bynrap “Ka jingthmu jong ngi kam long ban buh jingma lane pyniap ïano ïano, la ka dei ki riewlum lane ki bar jylla”.
U Bah Sainkupar ula ong “Ngi la jied kyrpang ïa u sohpdung tang ïa ka nongkynti jong u Ma Sniawbhalang Dhar (Symbud Myntri Rangbah ka Jylla), na kata ka daw ngi la pynbthei ïa u bomb ha ka por shiteng miet lane dang step phrngap ban pynthikna ban nym don mano mano ruh ba mynsaw lane duh ka jingim”.
Haba maham ba ka jingsaitlah ïa ka HNLC kan lam sha ki jingeh kiba bun , u Bah Sainkupar ula pynpaw “Ma Sniawbhalang, ka por jong phi kala jan kut. Phi ïeng marwei ha ka jingkyntait ban siew, katba kiwei kim shym la kyntait ban kohnguh”.
“Kane kam dei ka jingmaham, kane ka por ban kylla. Ka lynti shakhmat ka khang sted. Jied da ka jingstad, hashuwa ba ka histori kan rai ïa phi” maham ka HNLC haba maham ruh ïa ki riewsaiñ pyrthei ka bri u Hynniewtrep ba kin shim ïa kane kum ka jingmaham ba khatduh.
Ka HNLC kala bthah ruh ïa ki nongkhaïi ba kin ïatreilang bad ka HNLC ne mad ïa ka jingkut. “Kan ym don jaka riehtngen ïa kito kiba ïaleh pyrshah” ula pynkut.