Shillong, Nailur, 21: Ka Atomic Mineral Directorate for Exploration and Research ka la kam ba kam shym la don shuh kano kano ka jingkhlong ïa u maw Uranium ha ki hynñiew tylli ki jaka ba don u Uranium ha South West Khasi Hills District.
Katkum ka jubab RTI ba la aiti da u Head, PMS Group uba long ruh u Public Information Officer (Tech matters) ka AMD sha u Bah Disparsing Rani, na ka ophis jong ka Atomic Mineral Directorate for Exploration and Research, Hyderabad, ka la pynpaw ba ka jingleh sorjamin bad ka jingkhlong ïa ki nuksa maw Uranium ha Domïasiat, Wahkyn-Wahkut, Gomaghat-Phlangdiloiñ, Tyrnai bad Umthongkut, Lostoiñ ka la sdang naduh u snem 1955-1956 ter ter haduh u snem 2018 hynrei naduh u Naitung, 2018 ka AMD kam shym la bteng shuh ban dang sorjamin bad ban dang khlong ïa ki nuksa maw Uranium ha kane ka Jylla Meghalaya.
Ha ka jingïakren bad ki lad pathai khubor ha ka sngi Balang u Bah Disparsing Rani u la ong ba katkum ka jingai jingkheiñ jong ka Atomic Mineral Directorate for Exploration and Research, u Uranium uba don ha kane ka jylla Meghalaya u long 23,263 ton.
Katkum ka jubab RTI, ka AMD ka la pyntip ba ka Khasi Hill Autonomous Distirct Council (KHADC) ka la ai ïa ka No Objection Certificate (NoC) sha ka Atomic Mineral Directorate for Exploration and Research ha ka 20 tarik, Naiwieng, 2012.
Ha kaba ïadei bad kane u Bah Disparsing Rani pan jingtip ruh na ka AMD hato kan dang bteng neem ïa ka jingtih ïa ki nuksa maw Uranium. Katkum ka jubab RTI, ka ADM ka la pyntip ba ïa ka jingkylli halor kane la phah sha ka Uranium Corporation Limited of India (UCIL) ban ai jubab.
Ka AMD kam shym la ai jubab satia sha u Bah Rani ha kaba ïadei bad ki kam pynroi sha ki nongshong shnong ba don u Uranium.
