Kam ju kham jia koit ba u paidbah un ïakhun mukotduma pyrshah ïa ka sorkar: Dr Mukul

Shillong, Nohprah 09: U Nongïalam ka liang Pyrshah bad u ba dei ruh u Myntri Rangbha barim ka jylla u Dr Mukul Sangma u la ong ba kam ju kham jia koit ba u paidbah un hap ïakhun da ka mukotduma pyrshah ïa ka sorkar ba u jied hi na bynta ban ai jingshakri na bynta jong u namar kaei kaba ka sorkar ka leh ka long markhongpong ïa kaei kaba u paidbah u angnud bad khmih lynti na ka sorkar, ong u Dr Mukul haba kren halor ka jingleit ujor ki katto katne ki khlieh nongsynshar bad kaba ka ïing Bishar ruh ka la pynsahngeh shipor ïa ka jingpyntreikam ïa ka MoU pynbeit pud ba la ïasoi hapdeng u Myntri Rangbah ka jylla Meghalaya bad Assam.
Haba kren sha ki lad pathai khubor, u Dr Mukul u la ong kane ka jinghap leit tied jingkhang da ki riew paidbah sha Ïing bishar ban don ba sngap ïa ka sur jong ki namar ka sorkar kaba dei hok ban leh ka la kyllut ki shkor ban sngap ïa kiei kaba u paidbah u dawa halor ka MoU.
“Ha ka jingshisha kadei ka kamram jong ka sorkar ban ïakhun na ka bynta ka bha ka miat ki paidbah hynrei ka long kaba sngewsih ban ïohi ba ki paidbah jong ka jylla ki hap ban ujor mukotduma hi pyrshah ïa ka sorkar halor ka jingbym hun ïa ka jingpynbeit pud bad ka jylla Assam,” u la ong.
U la ong ba kum u nongïalam pyrshah uba hap ban kdew ïa ki jingtreikam bym ïahap jong ka sorkar bad kum uwei ba la ïeng pyrshah ïa ki kyndon kiba la ïasoi MoU u sngew dei ba ka sorkar ka dei ban pyndam noh syndon ïa kane ka MoU namar ka jingleh ka sorkar ka long kaba shu leh bam ja khluit khlem don kano kano ka jingïasyllok shuwa bad ki paidbah kiban shah ktah ïa kane ka jingïasoi MoU jong ki ar jylla.
U Dr Mukul u la khublei ïa ki khlieh nongsynsharkiba la ujor da ka mukotduma pyrshah ïa ka sorkar Meghalaya namar ka la ïasoi MoU bad ka jylla Assam khlem da ïamir jingmut lang bad ki trai khyndew bad ki paidbah nong shong shnong khamtam kito kiba na ki thaiñ khappud.
U Dr. Mukul u la ong ruh ba ha shuwa ban ïasoi ïa ka MoU bad ka sorkar Assam kum ka liang pyrshah ki la pynsngew sha ka sorkar jylla ba kam dei ban ïaid shakhmat namar kane ka MoU kam pat pynhun ïa ki paidbah khamtam ïa ki trai jaka bad nong shong shnong ha ki thaiñ khappud hynrei ka sorkar Meghalaya kam sngap wat ïa ka sur u paidbah ka jylla.
“Kane ka ka hukum jong ka ïing kashari kan dei ban pynkyndit thiah ïa ka sorkar jylla ba kam dei ban leh pyrshah ïa ki paidbah, ki trai jaka bad ki nong shong shnong ka jylla bad na ka liang ka AITC kan ap shuwa namar na ka liang ka ïing kashari kan shong bishar biang halor kane,” u la ong.
U Dr. Mukul u la ong ba ka jingshah ktah ki trai jaka bad ki nongshong shnong ha ki thaiñ khappud ka ktah lang ïa baroh ki paidbah ka jylla bad dei namar kane baroh ki la ïeng pyrshah halor ka MoU namar ka sorkar Meghalaya kam shym la ïaid ha ka lynti ba ïa mynjur lang da baroh ha ka por ïakren pynbeit pud bad ka Assam.
U la ong na ka liang ka AITC bad kiwei ki sengsain pyrthei, ki seng bhalang bad baroh kiba don bynta ha ka jingïakren pynbeit pud ki la ai jingmut ïa ka sorkar jylla ban ïaid katkum ka jingaijingmut khamtam na ki trai jaka hynrei ka sorkar MDA haduh mynta mynne kam shym la sngap bad dei namar kane ki paidbah ki hap ban ujor da ka mukotduma pyrshah ïa ka sorkar.
Lah ban kdew hangne ba ki saw ngut ki khlieh nongsynshar kiba la leit ban ujor da ka mukotduma pyrshah ia ka sorkar halor ka MoU ki kynthup ïa u Syiem ka Hima Jirang u R Hamberly Wahlang, u Acting Syiem ka Hima Mylliem u Ainam Manik Syiem, u Sirdar ka Nonglang Sirdarship u Pholasly Nianglang bad u Acting Syiem ka Hima Nongspung Syiemshipu Erald Jyrwa.