Kam ïahap ba ki Syiem bad Sirdar kin shu ïeng shabar haba ki wan donkam sha District Council

Shillong, Nailur 11 : Ki Khlieh Nongsynshar ba hap ha u pud u sam jong ka KHADC kin sa ïoh noh la ka jong ka kamra ba kyrpang naduh ka sngi Thohdieng ha ka ophis treikam jong ka District Council, pynbna u Deputy CEM ba dei peit ïa ka tnad Elaka, Bah Pynshngaiñ N Syiem ha ka sngi Balang.
Haba kren bad ki lad pathai khubor, u Deputy CEM u la ïathuh ba kane ka sienjam kadei kaba la shim da ka Executive Committee da ka thong ban pynsuk ïa ki Khlieh Nongsynshar kiba wan ban donkam ïa u CEM ne Deputy CEM bad ruh ïa kiwei ki Executive Member na ki ophisar na ka bynta ki kam ki jam jong ki Hima, Elaka, Raid bad ki shnong ki thaw.
“Kane ka kamra kyrpang kan pynsuk ïa ki Khlieh Nongsynshar ba kin ïoh shong pyrkhat kam, lane ïa syllok bad ruh kum ka jaka shong jahthait haba ki wan donkam sha KHADC. Katno ka long kaba i synei ba ki Khlieh Nongsynshar kin hap ban shu ieng shabar haba ki wan na ka bynta ki kam jong ki Hima ki Elaka ne ki Wahadadar,” bynrap biang u Deputy CEM.
La ïathuh ruh ba ïa kane ka kamra kyrpang yn wan ban plie da u CEM ka Council, Bah Pynïaid Sing Syiem.