Shillong, Jylliew 13 : Ki samla Khasi ki lah beit ban poi kham bun ha ka Top Ten la ka long ha ka result SSLC ne HSSLC lada ki minot bad trei shitom bha, ong i samla Finora Wankhar, i samla ba wan ha ka 9th Position ha ka result HSSLC Arts kaba dang shu pynbna shen da ka MBoSE.
Ia kane, i samla Finora i la pynpaw ha ka jingialang pynkup burom ba la pynlong da ka UDP Mylliem kumjuh na ka Nangthehsei ha ka jingialang kaba lyngkot kaba long ha ka janmiet sngi Nyngkong ha iingsah jong i hi.
Ha kane ka jingialang baroh ki nongkren kynthup naduh u President ka UDP Mylliem, nangta President Women’s Wing Mylliem bad ruh ki nongialam jong ka Nangthehsei ki la pynpaw ka jingsngewkmen halor katei ka jingpass bha jong itei i samla.
I samla Finora Wankhar iba dei i khun jong i Kong Glorina Wankhar bad Bah Sanbor Nongrum, ba shong ba sah ha Lawsohtun, i la ong ruh, “Ki samla Khasi jongngi kim poi satia ha ka jingstad hynrei donkam sa tang ka jingtrei shitom bad minot.”
Da kaba pynpaw ba i don ka thong ban iakhun tyngeh haduh ba in da ioh ban shimti kum ki heh ophisar ha ka sorkar jylla, i samla Finora i la pynpaw ruh ia ka jingkmen ba ki la don bun ki samla Khasi kiba da ka jingminot bad ka jingtrei shitom ki la sdang ban iaknieh lang ia ka Top Ten ha bun ki eksam.
