Kam don satia ka jingthmu ban weng ïa u Bah Pala na ka shuki President MPCC : Dr. Chellakumar

Shillong, Risaw 29 : U Heh ka All India Congress ba peit ïa ka Meghalaya, u Dr. A Chellakumar, u la kyntait mardor ïa ki khubor ban bujli noh ïa u Bah Vincent H Pala na ka kam President jong ka Meghalaya Pradesh Congress Committee (MPCC) da kaba ong ba kane ka shuki kam pat thylli.
Haba jubab halor ka jingkylli haba ïadei bad ka kam nongïalam jong u Bah Vincent H Pala na ka liang utei u heh Congress u la ong, “Kumno phin ong kumta? Lada don kiba phet na ka Congress kam mut pat ba ka dei ka jingbakla jong ki nongïalam.”
U la bynrap ba kito kiba mih noh na ka seng bunsien ki shah pynkhih ha ki jingmyntoi shimet bad kumta u ong ba ka Congress kam don hangne ban “pynbeit ïa ka nong na ka bynta ki katto katne ki riew shimet.”
Ha kawei pat ka liang u Dr. Chellakumar u la ïaroh ïa u Bah Pala, da kaba ong ba u dei u nongïalam party u ba aiti lut ïalade ha ka Congress bad uba la shakri kum u Myntri ha ka sorkar pdeng bad u trei shitom kum u President ka PCC.
“Mynta ki briew kiba la mih na ka Congress ki wan phai biang, bad kito kiba la shakri ïa ka jylla ha ki bynta bapher bapher ruh ki wan rung sha ka party, da kaba pdiang ïa ka jinglong nongïalam jong u Bah Vincent Pala,” u la ong.
Utei u heh Congress ba dei peit ïa ka Meghalaya u la ong ruh ba ka seng Congress ka buh ïa ka jaitbynriew hakhmat eh bad ka plie lad ban pdiang sngewbha biang ïa kito kiba la sngewthuh ïa la ki jingbakla bad kiba kwah ban shakri ïa ki paidbah. “Ngim don hangne ban thied ïa uno uno kum kiwei pat ki seng sain pyrthei,” u la ong.
“Da kaba pdiang ïa ki nongrim jong ka seng Congress, uno uno u lah ban ïasoh bad ka party,” u la bynrap shuh shuh.