Kam don jingïapait ha ka UDP, ngim pat rai ruh ïa ka tiket ha Nongkrem: Allantry Dkhar

Shillong, Nailar 28: U Vice-President jong ka United Democratic Party(UDP) u Bah Allantry Dkhar u la kyntait war ba ka don ka jingpait jingpra ha ka party.
Haba kren bad u Mawphor u Bah Allantry u la ong ba kum ka party ka don ha ka jingïatylli mlon bad kata ka jingkam ba ka lah ban kad arliang ruh ka dei tang ka Khubor lamler. “Kat kum ka jingtip kaba nga don ngam ïoh jingtip ba ka don kaba kum kata,” u la ong.
Shuh shuh u la ong, “Kata ka jingong ban mih kata ka UDP-O ruh kam dei kaba shisha namar ha ka party ka don ka jingïatylli mlon bad ka jingïasngewthuh jingmut kita kiba kam ba ka don kaba kum kata kin lah ban jubab namar ha ka seng kam don ka kum kata” u la bynrap
Haba la kylli pat halor ka jingmih khuor ba ka UDP kam ïoh kyrtong satia ha Pynursla na ka liang u Bah Allantry u ïathuh ba ka party ka la pynkhreh ban ïakhun pyrshah ïa u Symbud Myntri Rangbah ka jylla bad ha kaba ïadei bad u kyrtong u la kam bna ka dang don ka jingpynbeit. “Ban ong ba ngim ïoh kyrtong na Pynursla ka dei kaba bakla shibun namar kumba long mynta ngi dang ïa pynbeit ïano ban pynmih sha khmat” u la ïathuh.
Haba ïadei pat bad ka jingïaknieh tiket ha Nongkrem ha kaba na ka liang u Senior Advicer jong ka u Bah Bindo M Lanong u la pynpaw ba un ïakhun beit na Nongkrem bad ba u MLA ba mynta jong ka Nongkrem ruh u Bah Lambor Malngiang ka la paw ba u kwah ban ïakhun na ka tiket UDP, u Bah Allantry u la ong ,”Kumba long mynta ngim pat rai ïano ban ai ka tiket UDP na Nongkrem bad kumba ka riti pynïaid kam ka seng ka la kdew ba dei ka State Election Committee kaban rai ïano ban ai tiket bad kumba long mynta na ka liang ka committee ruh kam pat shym la shong jingïalang statia”