Shillong, Nohprah 04 : U Chairman-cum-Managing Director ka MeECL u Sanjay Goyal ha ka sngi Palei u la pynshai ba ka jinglip bording kaba ju jia man ka por ha ka jylla ka dei namar ka jingdonkam ban maramot bad pynbha ym na ka daw ka load shedding
Ha ka jingïakren bad ki lad pathai khubor, u CMD u la ïathuh ruh ba ki hap ban shim ïa ka sienjam ban pynlip shipor ïa ka bording ha ki katto katne ki jaka namar ki la hap ban pyntrei bun bha ki kam lyngba ka Revamped Distribution Sector Scheme (RDSS) bad kiwei ki skim ban pynbha bad kyntiew kyrdan ïa ki bun ki lain bording.
“Kan ym long satia ban treikam haba don ka bording wat ïa ki jingpynbna la ju pynmih ha ki kot khubor man ka sngi haba ïadei bad ka jingdonkam ban pynlip bording,” u la ïathuh shuh shuh.
U Goyal u la batai ba ki jingpynlip bording shipor ki long kiba donkam na ka bynta ban maramot bad pynbha shuh shuh ïa ka lain bording da kaba ong ruh, “Ka dei tang ha kane ka aiom ba ngi lah ban leh ia ka kam. Kane ka kam kan dang bteng ha kylleng ki shnong bad ha ki tarik ba la pynbeit kylleng kylleng.”
U la ban jur ba ym shym la pyntreikam ïa ka jingpynlip bording, da kaba ong, “Kam don ka jingpynlip bording. Ka jingpynlip bording ka lah ruh ban dei namar ki jingthut ha kito ki shnong, kum ka meter kaba kem ding, bad ngi hap ban ot ïa u lain bad weng ïa u wire.”
U CMD u la kyntu ïa ki nongshong shnong ban ïaishah shipor ia kine ki jingeh, da kaba ong, “Phi hap ban ai por ïa ka MeECL ban maramot bad pynbha ïa ki lain. Ïa ka jingseisoh phin sa ïohi hadien shisnem haba don ka lyer kiba jur hynrei kan ym don shuh ka jingpynlip bording.”
Ka MeECL ka dang don mynta ha ka kam kaba heh bha kynthup ban buh thymmai 2500 tylli ki transformer, 4500 km ka lain thymmai, bad ban bujli 1000 km ki wire.
Na ka liang u Goyal u la ong ruh ba ka jingpyrshang mynta ka dang ïaid mynta ban kham pynduna ka jingpynlip bording khamtam eh ha ka por ba don ka eksam.
