Kam dei ha surok hynrei ha ka miej jingïakren ban pynbeit ïa ki ishu: Dy. CM

Shillong, Jymmang 28 : U nongïalam ka NPP ba dei ruh u Symbud Myntri Rangbah ka Jylla, Bah Sniawbhalang Dhar u la ong ba ïa ki shu dei ban pynbeit ha ka miej ïakren ym ha surok.
“Ngi don ki ishu hynrei ban pynbeit ïa ki ishu, kam dei satia pat ha surok hynrei barabor kadei ha ka miej ïa kren,” ong u Bah Sniawbha.
Katei ka jingkren jong u, ka dei hadien ba u nongïalam ka Voice of the People Party (VPP), u Bah Ardent Miller Basaïawmoit u la kyntait ïa ka jingtyrwa jong ka sorkar ban ïa kren hynrei u la rai ban bteng beit ïa ka jingshah thngan ba khlem buh por ban dawa bishar bniah biang ïa ka Reservation Policy.
U Bah Sniawbha u la ong ruh ba u Bah Ardent um shym la wan satia sha ka jingïalang ba la khot da u Myntri Rangbah ïa ki seng saiñpyrthei. “Lada jia ba u don lang ha katei ka jingïalang u lah ban ai jingmut halor katei ka phang,” u la bynrap biang.
Halor ka jingkylli, u Symbud Myntri Rangbah u la ong ruh ba ka sorkar ka la kyrpad ïa utei u nongïalam ka VPP ban sangeh noh ka jingshah thngan bad wan sha ka jingïakren tangba u kyntait. “Ngin sa kren ïa kane ynda la wanphai u Myntri Rangbah,” u la ong.
Shuh shuh haba kren pat halor ka jingdawa jong utei u nongïalam VPP ban bishar bniah biang ïa ka Reservation Policy katkum ka jingbun briew ha ka jylla, na ka liang u Bah Sniawbha u la ong, “Kata kadei ka jingsngew jong u hynrei ka sorkar pat kan sa rai kadei kaba bha tam naka bynta ki paidbah ka jylla.”
Ha kawei pat ka liang, utei u nongïalam ka NPP u ong ruh ba ka VPP ka don tang saw ngut ki MLA kiba kren ïa kane ka ishu katba ki 56ngut kiwei pat ki MLA ki sngewthuh ïa ka.
Nalorkata, u ong ruh ba wat kiwei ki party ba don ha ka liang pyrshah ruh kim kyrshan ïa u Bah Ardent halor kane ka ishu. “Wat ki party ba don ha ka liang pyrshah ruh kim kyrshan ïa u, kumta nga tharai hap ban ïa kren sani bha ïa kane ka kam ha ka lynti kaba dei,” u la ong. Katkum ka jingong jong u, ka jingïada ïa ki paidbah ka jylla kadei ka bynta kaba hakhmat eh bad kumta u ong ba ka sorkar ruh kan peit ha kata ka lynti hi.
Halor ka jingkylli ki party ha ka liang pyrshah ruh ki ïa pait halor kane ka ishu, ka jubab kaba u Bah Sniawbha u ai ka long, “Ngam lah satia ban ong halor kane hynrei ki tip khambha kaei kaba dei bad kaei ka bym dei namar ki dei ki nongmihkhmat paidbah. Ki dei kiba la nang la stad bad ki tip ruh kaei kaba dei bad ka bym dei.”
Kumban shu kdew hangne ba u Bah Ardent u la kren shai ba un ym weng satia ïa ka jingshah thngan katba ka sorkar kam pat bishar bniah biang ïa ka Reservation Policy. Ïa kane u la pynpaw ha ka Kong Ampareen Lyngdoh kaba la wan jngoh ïa u ha katei ka jaka shah thngan ha ka sngi Thohdieng ba la dep.