Kala dei ka por ban pynmih ïa ki nongïalam ha ka jylla; Ong u MLA ha ka jingïalang sam khusnam ka KSU

Shillong, Nailur : U MLA ka Mawlai u Bah PT Sawkmie haba aijingkren kum u Kongsan ha ka jingïalang sam khusnam jong ka Seng KSU Kyntonmassar Unit ha ka sngi Saitjaiñ ba la lah ula ong ba ka la dei ka por ban pynmih ïa ki nongïalam ha ka jylla khnang ba ka jylla kan lah pat ban kiew shaphrang ha baroh ki liang.
Ula ong ruh ba kum ki samla pule kiba long kawei ka lawei jong ka ri bad ka jaidbynriew ki dei ban don lypa ïa ka thong ha ka jingim ka jong ki khnang ba kin poi sha ka kyrdan jong ka nam bad ba kin long ka jingmyntoi ïa ki longdien ki mandien jong ka ri bad ka jaidbynriew hi baroh kawei.
Nalor kata ula ong ruh ba kum ki samla pule ha kane ka juk kaba mynta ki ïakynduh ïa shibun ki jingeh namar ki jingkylla ha ka liang ka polisi treikam jong ka sorkar pdeng. Hynrei, ula ban pat ba kum ki samla ki dei ban ïaid shakhmat bad ban trei minot thop khnang ba kin poi sha ka thong kaba ki angnud.
Kum u MLA uba mihkhmat ïa ka Mawlai constituency kaba heh bad kaba bun ki nongshong shnong kiba dei ki trai shnong ula ong ba um shym la shong kli kti ban rah ïa ki mat (issue) kiba ïadei ym tang jong ka shnong Mawlai hynrei jong ka jaibynriew hi baroh kawei, kata la kalong ha kaba ïadei bad ka jingdawa ban pyntreikam ïa ka ILP, ka jingwan buhai shnong da ki briew kiba na shabar ka jylla nalor kiwei pat ki mat da kaba bteng ban ïai kren hapoh ka dorbar assembly ka jylla.
Katba na ka liang u Symbud Kongsan, u Samla Raymond Kharjana uba dei u Educational Secretary ka KSU Sengkmie, ha ka jingkren ula ong ba ki sngewkhia jur namar na ka liang ki nong synshar ki bym don ïa kata ka jingnang jingtip ne ka jingïatip lem ban shakri hok na ka bynta u paidbah bad kaba la wanrah shibun ki jingeh khamtam ha kaba ïadei bad ki samla pule.
Ha kajuh ka por ula ai khublei kyrpang ïa kine ki samla kiba la ïoh pdiang ïa kine ki khusnam da kaba ong ruh ba kane ka dei tang ka jingsdang ha ka lynti ïaid kaba jlan ban poi sha ka thong jong ka jingjop.
Ha kajuh ka por ula kyntu ruh ïa ki samla pule ba kin nang trei minot bad ruh ban don ïa kata ka mynsiem jong ka jingïatip lem na ka bynta ban tei ïala ka jong ka jaidbynriew.
Kiwei pat kiba la aijingkren ha kane ka jingïalang ba la pynïaid da u Samla Oraldo Marb aniang, Vice President KSU Kyntonmassar unit ki kynthup ruh ïa u Rangbah Shnong ka Kyntonmassar, u Dr Marco Mitro, na u Edu.Secy. KSU Mawlai Circle , u Samla Banlumlang Lyngdoh, ka jingkren na i Resource person i Samla Riti Biam iba dei ruh i AEE jong ka MePTCL nalor kiwei pat.
La pynphuh pynphieng shuh shuh ïa kane ka sngi da ki jingshad na ki kynhun bapher bapher bad la ïoh ruh ban ot ia u cake eh rngiew bad ka jingkmen halor ka jingbun jong ki khynnah kiba pass ha ka SSLC Exam 2022 na ka shnong Kyntonmassar.