Shillong Nailar 11: U President ka Hynniewtrep Youth Council (HYC) Bah Robertjune Kharjahrin ula pynpaw ka jingbynniaw ba u Myntri Rangbahduh ka ri Narendra Modi, um shym la ai satia ïa ka jubab kaba shai halor ka jingdawa pyntreikam noh ïa ka Inner Line Permit (ILP) hapoh ka Jylla namar la bun bun sien mynta u jubab kajuh shi kajuh ba dang bishar bniah bad dang bishar bniah beit.
U Bah Kharjahrin ula ong ba ka seng ka ai khublei ïa u Myntri Rangbah ka jylla bad ïa ki Myntri Sorkar kiba la leit ban buddien ïa ki mat kiba kongsan ba kynthup ïa ka ILP bad ban pynrung ïa ka ktien Khasi ha ka Eight Schedule jong ka riti synshar ka ri bad halor ka jingïakren pynbeit ïa u pud u sam bad ka jingpynkylla ïa ki kyndon jong ka Sixth Schedule jong ka riti synshar ka ri.
“Ngi ai khublei ba ki la leh ïa kaei kaba ki la kular hynrei kaba kham sngewsih ka long ba u Myntri Rangbahduh ka ri um shym la ai kano kano ka jubab kaba shai la yn ai bad lada ym ai ruh ym pynpaw balei ym ai, ka jubab kaba u ai kadei kato ka juh ka jubab kaba rim kaba la jubab mynta la baroh 4 ne 5 snem kata ba ngin eksamin. Ka jingkylli ka long kiei ki bynta kiba ka sorkar India ka dang eksamin sah lada dei ïa ka ILP” ong u Bah Kharjahrin.
Ula ong, ba ïa ka ILP la pyntreikam ha ki 4 tylli ki jylla jong ka ri India bad ki la don bun ki kynhun kiba la pyrshah ïa ka ILP ha ki iingkashari bad ha ka Supreme Court, hynrei ka ïing bishar ka la pynksan bad ka riti synshar ka ri ka shah bad ka long kaba bit ba biang ban pyntreikam.
U Nongïalam ka HYC ula ong, ba ki nongjngohkai ki lah ban applai ïa ka ILP lyngba ka Electronic ILP ïa kaba kim donkam ban leit shim phom ne ïeng laiñ hynrei ki donkam tang ban shu pyndap ïa ki jingtip ki jongki ha ki mobile ne computer bad ban phah ha ka ban ïoh ïa ka ILP bad ka jingdon ki kor ki bor kan pynsted ïa ki kam ki jam baroh.
Ula ïathuh ba ka seng ka la dep ruh ban ai jingmut ban buh ïa ki Facilitation Centre kaba ki paidbah kin shim ïa ka ILP la ka dei ha ki kad liengsuiñ ne ha ki thaiñ khappud.
Ha kaba iadei bad ki nongshong shnong ka Assam kiba ïaid lyngba ka jylla Meghalaya, u Bah Roberjune ula ong, “Ka jingthmu jong ka ILP ka dei ban ïada ïa ka jylla na ka jingshah tam paid noh ha kiwei khnang ba kin ym ïoh bor ha ka kam synshar khaddar, kin ym ïoh bor ban thied ïa ka khyndew ne ban knieh ïa ki kam ki jam jong ngi”.
Ula ong, ba ka seng ka la kren shai ba kan ym ktah ïa kita ki briew kiba shu ïaid lyngba ka jylla dei ban ai noh ïa ki da ka ‘Transit Pass’ bad haba ki la dep ban ïaid lyngba ki dei ban ai noh ïa katei ka pass ne ban ïathuh ba ki la mih noh na ka jylla Meghalaya.
