Kaei ka daw ba ka MeECL kan hap ban pynlip bording khah khah manla ka sngi, kylli u Bah Adelbert

Shillong, Nohprah 11: U MLA ka 17th North Shillong Constituency u Bah Adelbert Nongrum ha ka sngi Palei u la phah da ka shithi sha u Myntri ka tnat Bording ka sorkar jylla u Bah Metbah Lyngdoh ban pan jingpynshai na u halor kaei ka daw ba la pynlong ïa ka tnat MeECL ba kan pynlip bording manla ka por bad bunsien ha ka shisngi naba kane ka la wanrah ka jingeh ïa ki paidbah nongshong shnong.
U MLA ha ka shithi u la pynpaw ïa ka jingsngewkhia ban lap ba manla ka sngi bad manla ka por la ka long ha ka por mynstep, por mynsngi, ha ka por janmiet bad wat ha ka por mynmiet ruh ka don ka jingpynlip bording kaba khari khari khlem tip ruh na kaei ka daw.
U MLA u la buh ruh ka jingkylli la hato kane ka jingpynlip bording kaba manla ka sngi ka dei na ka daw jong ka jingbym shim khia ki nongtrei kiba kynthup naduh ki Engineer, ki ophisar ne na kaei ka daw.
Na ka liang u MLA u la buh ruh ka jingkylli da kaba ong, “Hato dei na ka daw ba kim lah ban pyndep bha ïa la ka kamram ne dei ba kim kwah ban trei ïa ka kam ne ïoh dei ba kim pat kot bor ban bat ïa ka kam ba ki bat ba ka la wanrah ka jingeh haduh katne ïa ki paidbah ban mad ïa kane ka jingeh jong ka jingshah pynlip bording kaba manla ka sngi.”
U Bah Adelbert Nongrum, ha ka shithi u la kyrpad ïa u Myntri ka tnat ban shim khia ban leit lem ïa kane ka jingeh ba mad da ki paidbah manla ka sngi bad ba un bthah ïa ki nongtrei ne ki ophisar ba kin kit khia ïa la ka kamram da kaba pynbiang ïa ki jingdonkam jong ki paidbah, namar ïa bai bording bad ka khajna na ka liang ki paidbah ki siew beit bad kumta ka tnat ruh kam dei ban ai ki daw ki bym ler kam ne ban pynthut ïa ki kam ki jam jong ki paidbah kaba ki hap ban trei ban ktah manla ka sngi da kaba hap ban pyndonkam da ka bording elektrik.