Kadei ka jingtynjuh, long katba long ngi dei ban jop ha ka elekshon MP : Prestone

Shillong, Rymphang 19 : U State President jong ka National People’s Party (NPP) Bah Prestone Tynsong ha ka sngi Nyngkong u la ong ba kane ka elekshon MP kadei ka jingtynjuh ïa ka party bad na kata ka daw kin hap ban ïakhun tyngeh ban pyntikna ba ka kyrtong MP jong ka party na Shillong kan ïoh ïa ka jingjop.
“Kane kadei ka jingtynjuh ïa ngi ha kane ka elekshon MP kumta ngi hap ban jop beit. Watla ka khubor ba ngi ïoh ka long kaba sngewtynnad hynrei kam long pat ban kheinsting hynrei ban trei shitom shuh shuh,” u la ong haba kren ha ka jingïalang pdiang burom ïa ki arngut ki MDC Congress kiba wan pynïasoh sha ka NPP.
Kitei ki arngut ki kynthup ïa u MDC ka Mawkyrwat Bah Carnes Sohshang bad u MDC ka Mairang Bah Batskhem Ryntathiang nalor u MDC barim ka Sohra Bah Donevan Kharwanlang.
Shuh shuh u ong ba watla ki don ki nongïalam kiba buh jingkylli ïa ka NPP ha ka jingtreikam hynrei kim tip ba ka NPP ka ieng na ka bynta ka jingïatylli ki rit paidbah ym tang ha Meghalaya ne ha North East hynrei ha ka Ri baroh kawei.
U ong ruh ba kane ka pynlong wat ïa u Modi ruh ban tieng ïa kane ka party.
Ha kajuh ka por u Bah Prestone ba dei ruh u Symbud Myntri Rangbah ka Jylla u la pynshlur ba dei ban nang bun ki jait Ktien ym dei eh tang ka Ktien Khasi. “Nga babe ba ngam nang Ktien Hindi nga kwah ban nang pule tangba sniewbok katba nang pule katta nang king ka jabieng,” u la bynrap shuh shuh.
Kumta, u la ong ba u kwah ban pynshlur ïa ki khun samla ba ki dei ban kren Hindi nalor kiwei kiwei ki jait ktien. Katkum ka jingïathuh jong u ka la long ka burom kaba khraw ïa ka Jaidbynriew ban don haduh arngut ki riewshemphang kiba nang haduh palat 12 tylli ki jait Ktien. U ong ba kine ki kynthup ïa u Archbishop Dominic Jala ba la khlad noh bad u Rev SD Lakiang.
“Don ki party ba ong ba ym long ban nang kren Garo kumta shu buh lada don pat ki nongïalam na Garo kiba ong ba ym long ban kren Khasi kaei pat kaban jia,” u la ong.
Shwa kane na ka liang u National President Conrad K Sangma ba dei ruh u Myntri Rangbah ka Jylla u la ong ba lada ïaid katkum ka jingïoh vote ki MLA ha ka elekshon ba la dep ka party ka la ïoh palat 3.18 lak vote.
Kumta u ong ba da ka jingwan pynïasoh jong u Bah Carnes bad Bah Batskhem khlem artatien ka jingïoh vote ha kane ka elekshon MP ban sa long shen kan kot sha ka 3.50 lak vote.
U Conrad u la kyntu ruh ïa ki nongïalam ka party ba kim dei satia ban kheiñ sting ïa ka elekshon hynrei ba kin trei borbah khnang ban ïoh ïa ka jingjop.
“Kaba sah mynta ka long kumno ban ïoh biang ïa ka vote kaba ïoh kumba long ha ka elekshon MLA bad lada khein lang bad ka vote ba ïoh Bah Carnes bad Bah Batskhem ngin kot beit sha ka 3.50 lak vote,” u la bynrap biang.
Nalorkata u Myntri Rangbah u la ong ba ka elekshon MP kam slem shuh kumta ki khmih lynti ba la kumno kumno ha shwa ka 10 ne 15 tarik u Lber lah ban pynbna noh ïa ka elekshon MP kaba mut ba sa tang kumba 45 sngi ba ka elekshon kan sa poi.
Na ka liang u National Finance Secretary ka party Bah Sniawbhalang Dhar u la ong ba katba nang bun kiba beiñ ïa ka NPP hynrei katta pat nang bun ki nongïalam kiba wan Ïasoh sha ka party.
“Tangba lada ym don kiba kren bein kan ym pynlong ïangi ban trei shitom shuh shuh,” u la ong.
Ha kane ka sngi ïoh ruh ka jingkren na ki nongïalam ka party kynthup naduh ka kyrtong MP bad ruh nalor ki lai ngut kiba wan ban pynïasoh thymmai.