Ha kane ka juk mynta, sa kawei pat ka jinglong bym itynnad bad ka jingsniew dur jong ki briew jong ngi ka dei ka jingïathansi palat haba ïaleh ïa kano kano ka kam. La ka long ka kam shi met, ka kam ïing ne kam kur, ka kam shnong kam thaw ne ki kam ha ka imlang sahlang, bun hi kiba kwah ban ïathan suda ba kin pynleh lem ïa kino kino ki kam naduh ki barit haduh kiba heh ruh kumjuh. Lada leh kiwei ruh kim kwah, lada leh hi da lade ruh kim treh.
Kane ka bih kharoi ka nang pyntroiñ, nang sniew dur bad pynhiar arsut ïa ka ri bad ka jaitbynriew jong ngi. Kawei na ki nongrim kaba ngi dei ban kynmaw ka long ba ngi dei ban ñiewkor para briew.
Ha,oid, ym don uno uno ruh u briew uba nud ban ong ba u biang lut. Wat kito kiba ka pyrthei ka ong ba ki dei ki ‘riewkhuid ruh, hynrei ki sngewthuh kham bha ïa la ka jingduna jong ki ha ka longbriew manbriew. Kito ki briew kiba kam ne said hok ïa lade kum kita ki briew kiba hok eh ne biang lut ki dei ki briew ki bym ju peit ïit satia ïa lade.
Ka ktien tymmen ka ong, “Wat peit tang ïa u thngiat kiwei, hynrei to twad shwa ïa la ka jong ka Lyngthohdoh ne Lyngthangdoh.”
Ngim dei namarkata, ban shu peit than ïa ka jingduna kiwei ha ka longbriew manbriew namarba ym ju don koit hi u briew uba biang lut nadong sha dong ha kane ka pyrthei.
Ka long kaba sngewsih shisha ba mynta, la bun than eh tang kiba sait pap ne pynksan ïa lade ne ban ban bynshet lut ïa kiei kiei baroh ha kiwei pat.
Haba ïakren ïa kino kino ki kam ki jam, ka kam saiñhima sima, ka thoh ka pule, ka kam shnong kam thaw bad ka kam imlang sahlang baroh baroh ki said kyntip ne phah tynrong lem ha ka tyrpeng kiwei pat da kaba ong “Balei ngim ïa leh noh da kumne da kumtai”? Balei phim kren ne phim thoh noh shaphang kata kata ka kam kaba donkam bha? Kham bun hi ki kwah ban kiar na ka kamram ne ka jingkitkhlieh ïa lade khnang ban kham ïoh pynlut por ha kaba ïa beh ïa ki rongphong bad mangkarong pyrthei.
Ka la dei ka por ïa ngi baroh ba ngim dei shuh ban shu ïa ap ne khmih lynti tang ban leh lem kiwei hynrei “Leh hi noh” khlem da tyngkai, pynslem ne pyntud shuh nangne shakhmat ïa la ka por bad ka bor ba kordor jong phi khnang ban pynlong biang ïa ka Meghalaya jong ngi kum kata “Ka ri ba kyrpang jong ka jingkyrkhu, ka jingitynnad (ha ka Akor ka burom,ka tip briew ka tip Blei bad kiwei kiwei) bad ban long ruh ka nuksa ba bha ha ka ri India ba ïar ( a patch of grace and beauty and the shinning outpost of India” kumba la kren da u (L) Prof G..G Swell ha Parliament ha kito ki por.
