Kaba donkam ka dei ka jingroi jingpar ong u bah Hek
Pdiang ka BJP ïa ka rai ka Sorkar Pdeng halor ka MGNREGA
Shillong, Nohprah 22: U Nongïalam ka seng BJP bad MLA ka Pynthorumkhrah Bah AL Hek ula ai ka jingkyrshan ïa ka rai ba dang shen jong ka Sorkar Pdeng ban pynbeit thymmai ïa ka skhim Mahatma Gandhi National Rural Employment Guarantee Act (MGNREGA) haba pynpaw ïa ka jingkongsan ban don ka jingïatreilang bad ban shim lang ïa ka jingkitkhlieh hapdeng ka Sorkar Pdeng bad ki Sorkar Jylla ha kaba ïadei bad ka jingbhah ïa ka pisa.
Haba ïakren bad ki nongthoh khubor hynne ka Sngi Nyngkong u Bah Hek ula ong, “Ngi don ïa ka jingsngewkhia halor ka kam pynroi. Ka kyrteng kaba la mynshwa NREGA ka long kaba biang. Lada ka BJP ka kwah ban pynkylla ïa ka kyrteng bad lada ka dei kaba pdiang da baroh, kumta ngin ym don kano kano ka jingthud, namar ka thong ka jong ngi ka long ban pynïaid shakhmat ïa ki kam pynroi. Ki paidbah ha Nongkyndong, khamtam kito kiba bat ïa ki Job Card kiba na ki longïing baduk, kidei kiba la ïoh lypa ïa ka jingmyntoi bad mynta kin ïoh shuh shuh ïa ki sngi ban bylla”.
Ula bynrap ba ka jingpynkylla ïa ka rukom bhah tyngka ka long 90:10 hapdeng ka sorkar pdeng bad sorkar jylla kadei kaba la pdiang, da kaba pynpaw ba ka jingïashimbynta lang jong ki jylla ka long kaba kongsan ban long ki trai ba shisha jong katei ka skhim.
“Wat ki jylla ruh ki dei ban don lang ïa ka jingkitkhlieh. Haba ngi wanrah ïa kino kino ki kam pynroi ka jylla ruh kadei ban shim lang ïa ka jingkitkhlieh. Haba ka sorkar pdeng bad ka sorkar jylla ki ïatreilang kan don ka jingsngew ïa ka jinglongtrai lang ïa ka kam. Lada ka pisa ka wan thik tang na ka sorkar pdeng kumta kein la kam ba kadei ka skhim kaba la bei tyngka da ka sorkar pdeng. Hynrei haba ka don ka jingpynlut lang ia ka pisa, kumta ngi lah ban ïa shim lang ïa ka jinglong trai ha kaban pyntreikam ïa ka skhim” ula ong.
U Bah Hek ula pynpaw ba ka jingpyniar shuh shuh ïa ki sngi ban bylla hapoh jong katei ka prokram kan ai jingmytnoi shuh shuh ïa ki shnong ha ki thaiñ nongkyndong kiba don ha kylleng jong ka ri India kynthup ïa ka Meghalaya, kumta kane kan pynkhlaiñ ïa ka ïoh ka kot bad ïa ki jingtei ha ki thaiñ nongkyndong.