Shillong, Nohprah 02 : U Myntri Rangbah ka jylla u Conrad K Sangma u la kyntait ïa ki jingkynnoh jong ka Congress ba ka sorkar jylla ka ïalam ïa ka jylla sha ka jingkitram bad ong ruh ba ki jingkam jong ka ki long ki bym don nongrim bad kiba ïalam bakla.
“La bunsien nga la batai halor kane bad nga la dep pyni ruh ïa ka roi ka pa jong ka jylla,” la ong u Myntri Rangbah da kaba pynksan ba ka jingshim ram jong ka jylla ka long hapoh ki pud ba la buh da ka sorkar pdeng bad ka RBI.
U Conrad u la pynshai ba ka jingshim ram na ka World Bank bad na ka Asian Development Bank ki dei da 90:10 lane 80:20, ha kaba ka sorkar pdeng ka shim ïa ka bynta ban siew kham bun.
Katkum ka jingong jong u, 72 persen na kane ka ram la siew da ka sorkar pdeng bad ïa ka 28 persen pat la siew da ka sorkar jylla. “Kumta, ka jingkylli ban ong ba dei ka ram kam ïahap haei haei ruh,” u la ong da kaba bynrap ba kane ka jingkren ka long ban pynsngewthuh bakla ïa ki paidbah.
U Conrad u kyntu ruh ïa ka Congress ba ka dei ban da tip shwa ïa ka jinglong jingman ka pla tyngka jong ka jylla hashwa ba kin kren ei ei.
