Ka Workshop ha Shillong ka thmu ban pynkloi ïa ka rukom ai ram NDC ïa ki heh sorkar jylla

Shillong, Naitung 26: Ka ophis jong u Principal Accountant General (A&E), Meghalaya, ka la pynlong ïa ka workshop kaba shi-sngi halor ban pynbeit ryntih ïa ka rukom ai ïa ki No Demand Certificates (NDC) halor ki ram na ka bynta ki ophisar jong ki nongtrei Sorkar Jylla. Ïa kane ka workshop la pynlong mynta ka sngi ha Conference Hall jong ka PAG ha nongbah Shillong.
Ka workshop ka la pynleit jingmut ha kaba pynduna ïa ka por ba donkam ban ai ïa ki NDC na ka bynta ki nongtrei kiba dang trei bad kiba la shongthait – ka bynta kaba kongsan ha kaba pyntreikam ha ka por kaba biang ïa ki jingmyntoi bai bam tymmen. Ka jingpynslem ha ka jingai jingmynjur ïa ka NDC bunsien ka khanglad ïa ka jingsiew ïa ka bai bam tymmen, bad kane ka sienjam ka thmu ban weng ïa kum kine ki jingeh lyngba ka jingïatreilang kaba kham bha bad ki jingpynkylla ïa ka rukom treikam.
Ha kane ka jingïalang la sakhi ïa ka jingïashim bynta naduh ki ophisar jong ka ophis PAG, ka tnad kam pla tyngka jong ka jylla, bad ki Drawing and Disbursing Officer (DDO) na ka tnad ka rep ka riang. Ki jingïalang ïamir jingmut ki la ïarap ban ïoh ïa ki jingtip kiba seisoh – ka jingïasam halor ki jingeh kiba don bad ki rukom treikam ban pynbha shuh shuh ïa ka rukom treikam jong ka NDC ha baroh ki tnad.
Haba plie ïa kane ka workshop na ka bynta u Principal Accountant General, u Deputy Accountant General (AE&VLC) u la pynpaw ïa ka bynta ba kongsan jong ki NDC ha ka jingpynbeit ïa ki bai bam tymmen bad kyntu ruh ïa baroh ki tnad ba kin pyntreikam ïa ki rukom treikam kiba bha tam kiba la ïasam lang ha ki jingïamir jingmut.
La khmih lynti ba kane ka sienjam kan ïarap shibun ban ai jingmynjur kham kloi ïa ki NDC, ban siew ïa ka bai bam tymmen ha ka por kaba biang, bad ban pynkhlaiñ ïa ki rukom pynïaid pisa ha ka Sorkar Jylla Meghalaya.