Nongstoiñ, Risaw 05: Ka Hynñiewtrep Youths Council HYC West Khasi Hills District, ha ka sngi thohdieng kaba dei 4 tarik Risaw 2024, ha ka jingïalam u Samla Lumlang Kharsyiemlieh President bad samla Disterborlin Wanniang Vice President lem bad kiwei kiwei ki dkhot, ka la ïoh ban ïakynduh ïa u MP ka Shillong Parliament Dr Ricky AJ Syngkon ha Riangdo, halor ki surok ba kongsan eh hapoh ka West Khasi Hills District.
Kine ki surok ki long ka jingsahkut ka surok na Mawthir sha Kyrshai haduh khap Assam ba la shna da ka two lane, kaba ki paitbah ki kwah. Hynrei mynta ka la sah kut noh. Kumta ka seng ka pynpaw ba u MP un ïarap lem ba ka Phase 2 kan sdang noh, khnang lada lah dep kane ka surok kan kyntiew shisha ïa ka District baroh kawei.
Ka jingdonkam ka Surok Two lane ne Intermediate Road na Maweit haduh Kulang, khnang kan pynsuk ka leit ka wan khamtam ka ïa ki paitbah ka thaiñ Maweit.
La kyntu ruh ban pynïoh Two Lane noh na Nongstoiñ haduh Mawkyrwat, namar ka Intermediate Road mynta ka leit sha Wahkaji. Hynrei ki paitbah ki kham donkam ka surok heh na Nongstoiñ sha Mawkyrwat kum ka jingpynïasoh kaba khamjan jong ki ar District.
Ryngkat ka jingthoh la pynsngew ruh halor ka Intermediate Road ne Two lane, na Nongkasen sha Kynroh ban leit shaduh Nongkhnum kumba 18 kilometer eiei. Ban bteng noh da ka Two lane lane Intermediate na Nongjyllieh sha Nongkhnum, namar bun ki nongjngoh kai Pyrthei ki ban leit sha Nongkhnum ka kham jan bad kane ka surok kan long ka jingkyrkhu ruh ïa ka thaiñ.
La pynpaw ruh ban kyntiew ïa ka surok Sohpian sha Nongstoiñ da ka Two lane kaba rung ha ka District Head Quarter, namar kumba long mynta ka surok ka la rit palat bad ka la pynjynjar ïa ki paitbah.
Kawei pat ka surok ka long ban pynheh ïa ka Intermediate na Riwiang shaduh Tynghor bad Athiabari, namar kawei ruh shen kan don ka Synod ha u snem 2030, nalor ka dei kawei na ki jaka kaba bun ki mar rep ki mih kum Synsar bad Sying.
Ka seng ka la pynpaw ruh halor ka jingsahkut jong kiba bun bah ki surok PMGSY hapoh West Khasi Hills District. Ka HYC ka ong ba lada ïoh ban pynurlong ïa kine ki mat, kan wanrah shisha ïa ka kiew ka roi ka par ha ka Jaitbynriew khamtam ïa ki paitbah ka West Khasi Hills District.
Na ka liang ka seng HYC West Khasi Hills District ka kitbok kit rwiang ïa u MP ba un nang ïoh ka met kaba koit khiah, khnang ban nang lah ban shakri ïa ka Jaitbynriew, khamtam ban pynsngew ïa ki mat ka Jaitbynriew kum ka ILP bad ka Ktien Khasi ban skhem ka Jaitbynriew Khasi.
Ïa kitei ki Mat, ka HYC West Khasi Hills District ka la pynsngew ruh ha u Bah Ardent Miller Basaïawmoit ban ïa kyrshan lem, u ba la donlang ha katei ka sngi.
U MP u la kular un sa buh ban pyrkhat bad ban leh kaba donkam, na ka bynta ka jingbha jong ki paidbah nongshong shnong.
