Khliehriat Iaiong 17: Katkum ka jingpyllait hukum u Deputy Commissioner ka East Jaiñtia Hills District myn ha ka 12 tarik mynta u bnai, la hukum ba ka ophis C&RD Block Wapung kan treikam ruh shi sien shi taiew ha Lumshnong, Elaka Narpuh, kata tang ha ka sngi ïew Lumshnong, kata ha ryngkat ka jingtip lang u Waheh Shnong jong ka shnong Lumshnong.
La bthah ruh ba baroh ki nongtrei naduh ki officer kiba trei na ka bynta ki skim pynroi bapher bapher ha ka thaiñ ki dei ban treikam man la ka taïew ha ka sngi ba dei ka sngi ïew Lumshnong katba ha kiwei kiwei pat ki sngi kin trei na Wapung.
La bthah ruh ba u BDO u dei ban peit bniah halor kane ba ka kam kan iaid bad ruh ban pynpoi ïa ki kaiphot sha u Deputy Commissioner bad sha u Chairman jong ka DRDA man la ka taïew bad kane ka hukum kan treikam noh mardor.
