Ka VPP kan wanrah biang ïa ka dur ba paka ki Seng Riewlum, ong u Bah Ardent

Shillong, Nailar 30: Ka Seng Voice of the People Party(VPP) North Shillong Constituency ha ka sngi Ba-ar ka la pdiang sngewbha sha ka seng ïa ki nongïalam bad ki nongkyrshan na ka KHNAM bad ka HSPDP ha ka jingïalang kaba long ha Dorbar Hall jong ka Shnong Mawkhar.
Haba kren ha kane ka jingïalang, u Bah Ardent u la ong ba ka VPP kan wanrah biang ïa ka dur ka dar bad ka jinglong ki Seng Riewlum kumba ki ju long ha ki snem ba dang shu ïoh shen la ka jong ka jylla, kata ban khot bad pdiang ïa ki briew kiba ieid shisha ïa ka jaidbynriew bad kiba don ka mynsiem ban shakri ha ka jinglong duk jinglong rangli, ym ki briew kiba beh ïa ka spah.
“Lada phi peit mynta ki seng kiba kam ba ki dei ki seng riewlum ki da kren kop ba kin sei da ki heh spah ban ïakhun ilekshon ne ba wan pynïasnoh ki heh spah bad don ruh u President jong kawei ka seng riewlum ba heh tam ha ka jylla uba kam ba ka seng kaba u ïalam kam don jingkyrduh pisa eiei mynta ki kren beit shaphang ka pisa bad ha ki por ba mynshuwa kino kino kiba ïakhun ilekshon kim dei kiba bun pisa hynrei kiba don ka nongrim bad ka mynsiem shakri ïa ka jylla” u la ong.
Haba kren halor ka kam bamsap u bah Ardent u la ong ba kat shaba leit mynta wat u luk u lak ruh u ithuh ba ka bamsap ka la shyrkhei ha ka jylla bad u la ong ba dei na ka daw ka jingbamsap ba ka jylla ka wan beit sha ki kyrdan ba hakhmat na ka jingbym ler tam na ki jylla ha ka ri India. U la ong ruh ba na ka liang ka VPP ka nud ban kop ba kan wanrah ïa ka synshar khadar kaba khuid lada u paidbah ka jylla u pynkhamti ïa ka bor synshar ha ka. “Phin ïohi ba kiwei ki seng saiñ pyrthei kin kular ïa kane katai ym pat ïa ka jingsynshar kaba khuid kaba suba hynrei namar ngi don ka thong bad ka jingangnud kaba shida ban wanrah ïa ka jylla ka jingkiew shakhmat ngi nud ban kop ïa kane namar dei tang lada ngi lah ban weng ïa ka bamsap ba ngin lah ban kyntiew shajrong ïa ka jylla” u la ong.
U Bah Ardent u la ong ba kumba ïa ka VPP la seng halor ki ar tylli ki nongrim kata ban wanrah ïa ka synshar khadar kaba khuid bad ka jingskhem ka jinglong trai da ki trai muluk ïa khyndew ka shyiap.
“Ngim lah ban ïapeiñ ïa ka hok longtrai ki trai muluk ïa ka khyndew ka shyiap bad ngin ym ai lad syndon hi ruh ïa kane” bad u la bynrap ba “ka jingdon ka Land Transfer Act ka pynlong ba ïa ki jaka ba ki trai muluk ki dang ïoh jaka hynrei lada ym dei na kane ka aiñ ki jaka jong ngi ki la leit sha ka kti kiwei pat” u la ong.
Shuh shuh u Bah Ardent u la ong ba ka stieh jong ka jaidbynriew ka dei beit tang ka aiñ kaba lah ban ïada ym satia ka jingdon ki seng lehnoh ne ka jingbun ki kynhun seng bhalang.
Haba ïadei bad ka jingwan pynïasoh ki nongïalam barim ka KHNAM bad ka HSPDP sha ka VPP u Bah Ardent u la ong ba ka jingwan lang ha kajuh ka kynhun ban trei na ka bynta ka jaidbynriew bad ka jylla kam don jingartatien ba u Bah Adelbert Nongrum uban ïakhun na ka VPP un shah jied biang bad u la ong ruh ba da ka jingtrei shitom ha ryngkat ka mynsiem sngewrit kam don jingeh ban poi sha ka thong.
Haba kren ha kane ka sngi u President barim ka KHNAM North Shillong constituency u Bah Strong P Kharjana u la ong ba ka jingpynïasoh jong ki nongïalam ka KHNAM sha ka VPP ka long hadien ba ka jinglong jingman ha ka KHNAM kam shah shuh ïa ki ba kin trei ïa ka thong bad ka jingangnud na bynta ka jaidbynriew.
U la ong ruh bha shuwa ban pynïasoh sha ka VPP na ka liang ki nongïalam ki la pyrkhat sani da ki bun bun taiew bad ka jingrai ban pynïasoh ka dei namar ki mat bnad ka thong kaba i don mynba ki dang don ha ka KHNAM ki phalang shai kdar ha ka VPP.
Ha kane ka sngi la sakhi ba da kiba bun bun spah ngut ki nongkyrshan bad ki dkhot ka KHNAM bad ka HSPDP ki la wan ban pynïasoh pura sha ka VPP ha kaba la pdiang sngewbha da u President u Bah Ardent Miller Basaïawmoit, u General Secretary Dr. Ricky Syngkon, u Vice President Dr. Kara Shen bad kiwei kiwei ki nongïalam.
Ha kane ka sngi na ka liang ka u Bah Ardent Basaiawmoit President rangbah u la pynskhem pura ruh ïa ki nongkitkam jong ka VPP North Shillong ha kaba u Bah Strong P Kharjana kum u President bad u Dr Londoner M Sohtun kum u General Secretary bad kiwei kiwei ki nongïalam.