Ka VPP ka pyrshah ïa ka jingthombor hynrei ka kham lah ïa ka jingleh Gunda: Dr. Kharlukhi

Shillong, Ïaïong, 15: U State President barim ka NPP uba long ruh u MP ka Rajya Sabha Dr WR Kharlukhi ha ka sngi Baar ula sangah tyngeh ïa ka rai jong ka Voice of the People Party (VPP) ban dawa ïa ka jingtohkit ba laitluid halor ka jingkynnoh ba ka Sorkar ka la phiel ban pynlong ïa ka elekshon kaba ïaid beit ha JHADC, da kaba ong ba ka party ka pyrshah ïa ka jingthombor hynrei ka kham lah ïa ka jingleh Gunda.
Ha ka jingïakren bad ki lad pathai khubor, u Dr. Kharlukhi u la ong, “mynta ka sngi nga dang pule ha ka kotkhubor ba ki (VPP) la dawa ïa ka jingtohkit ïa ka jingshah rem jong ki ha ka elekshon ha Jaiñtia Hills Autonomous District Council (JHADC). Kumba ong u MLA jong ngi na Jowai, kine ki briew haba ki rem ïa ka elekshon ki ong ba shu leh thok hynrei haba ki jop ka biang beit.”
Da kaba kyntait ïa ka jingkam jong ka VPP ba ka jingthombor ka dei ka daw ba kongsan ba ka la rem ha ka elekshon ha JHADC, u nongïalam ka NPP u la ong, “phi tip haduh mynta nga dang don bad nga ïa ka video kaba la jia hadien ka elekshon haba kawei ka ïing jong u nongkyrshan jong ngi ka la shah thombor bad shah kawang da ki maw. Ngam ïohi ba kine ki briew, kiba ieid jaidbynriew ba kin pynrem, namarba kine ki briew, kaba ka ïing kaba la mad ïa ka jingshah pynjulor ha ka kynhun jong ki, ki dei ki paid Jaintia, ngam ïohi ba ki nongïalam kin pynrem.”
“Ki ong ba shah thombor hynrei kane kam long eiei hynrei ki jingleh Gunda kaba mut ba ki pyrshah ïa ka jingthombor hynrei ki kham lah ïa ka jingleh Gunda,” la kynthoh u Dr. Kharlukhi.