Ka VPP ka la iehnoh ïa ka Academic Reservation ka ban plie lad ïa ki samla ban sengkam la jong: Adelbert

Shillong, Naitung 06: U MLA ka North Shillong, u Bah Adelbert Nongrum u la kynthoh ïa ka seng Voice of the People’s Party (VPP) ba ka la iehnoh ïa ka Academic Reservation ne ka bynta kaba kongsan na ka bynta ki samla ba kin leit pule ha ki professional Course ka ban ai lad ïa ki ban seng kam la jong.
Ïa kane u la kren ha ka prokram pynkup burom ïa ki samla pule ka shnong jong ka Riatsamthiah Women Social Welfare Organisation (RWSWO) ha ka sngi saitjaiñ.
“Kane ka dei kawei ka mat kaba pynlong ïa nga ban rung sha madan jong ka saiñ pyrthei mynta lah 18 snem. Watla ngin ym lah ban pynhun ïa ki samla pule tang da ka kam sorkar namar kumba ka long mynta ka bhah thungkam ka long 40% ïa ki garo bad 40% ïa ki Khasi Jaiñtia bad lada laitkam 100 tylli ki nong aplai kin poi 1 lak ngut, kumta ngi lah ban ai ka jingkyrmen ïa ki samla tang da ka Academic Reservation,” ong u Bah Nongrum.
U la ong ba ka mynsiem jong u ka rhem watla u don tang marwei na ka bynta u paidbah kaba la pynlong ruh ïa u ban ïeng rangbah ban dawa ïa ka hok khamtam na ka bynta ka Academic Reservation kaba u la ong ba u dang ap ïa ka sorkar aïu kan leh namar kane ka reservation kadei ban plie lad ïa ki samla pule ban leit sha ki professional course bapher bapher ba kin wan ban sengkam la jong, kin ai jinghikai ïa kiwei, ba kin pynmih ïa ki kam namar kum ki samla ym dei ban shu ap beit tang ïa ki kam sorkar.
Haba ai mynsiem ïa ki samla pule u la ong, “Kane kadei ka sienjam kaba nyngkong ba phi pass ïa ka SSLC, CBSE, ICSE, ha shwa ba phin shim ïa ka rai ban ïaid shakhmat ïa ka jingim jong phi. Katno phi lah ban ïaid ka shong katno ka jingjylliew u tynrai lane u thied bah bad nangne phin ïaid lynti kumno ba phin jied ïa ki laiñ bapher bapher khnang ba phin long ka jingkyrmen ïa ka ri bad ka jaitbynriew.”
U la ong ba ha kane ka juk ba mynta bun ki samla ki la pynlutkai ïa ka jingim ha ka rta kaba 25, 30, 35 snem bad bun ki la leit phai noh na kane ka sla pyrthei bad kiba dang im pat bun ki swai naba bun ki ngop ha ki jingdih pynbuaid kumta donkam ka bor ban tehlakam ïalade khnang ban lah jied kano ka lynti kaba bha bad kaba sniew.
“Ngi la ïoh ka jylla la jong la kumba 52 tylli ki snem bad ka rta ka dei kaba la ih bha hynrei ka dang tlor, dang ringswai namar haduh mynta ngim pat don ki nongïalam ban aiti na ka bynta ka lawei ba phyrnai, ngi don tang ki politician ngim don ki nongïalam, ka jaitbynriew ka bun ki shynrang hynrei ngim don pat ki rangbah ba sa synjor ka imlang sahlang kumta donkam ïa ki samla ban pynleit jingmut bha ha ka kot bad hap pyndonkam bha ruh ïa ka technology namar tang 5 bad 10 tyngka phi la ïohi ïa ka pyrthei baroh kawei,” u la bynrap.