KA VPP KA DONKAM BAN NANG KUMNO BAN JIED BAD PYNÏENG KYRTONG

Ka Election MDC mynta kala jan, lada kata ka Amendment ïaka Sixth Scheduled kam ktah ïaka por Election te ka lah ban long ha ki bnai February lane March ha shwa ka Election MP. Kumba ngi la ïoh jingtip kiba bun ki kyrtong kiba mut ban ïa aireng kila sdang pynkhreh bad leit rung ïing briew ban pyn ithuh ïalade.
Ngim lah ban len baka seng saiñ pyrthei kaba dang mih thymmai ka Voice of the People Party ka la pyrshang borbah ban leit pynsngew-thuh ïaka nongrim bad ki mat treikam jong ka Party sha kylleng kylleng ki jaka jong ka ri Khasi Jaiñtia sha sor bad wat sha nongkyndong ruh ym tang ban pynsngewthuh hynrei ka don ruh ka jingpynrung kyrteng ban long kum ki dkhot jong ka party. Ngi ïohi ruh baki paitbah kylleng sawdong kiwan ryntih bad shongshit kat shaba wan kane ka party bad khamtam haba ai jingkren U Bah Ardent uba long u President rangbah jong ka Party.
Kane ka party wat lada ka long kaba dang thymmai ruh ka lah shisha ban khring bad ka ïoh shisha ka jingieit bad jingshañiah na ki paitbah, wat lada ka dang dei ka party kaba thymmai bad haka sien nyngkong baka ïa aireng ruh ka lah pat ban jop haduh saw ngut ki MLA sha ka Meghalaya Legislative Assembly ha kane ka Election ba dang shu dep.
Haba nga thoh kumne, ngam mut ban pynrem ne kynthoh ïaki to ki kyrtong kiba don jingmut ban iakhun nakane ka party lane ki kyrtong kiba kane ka party kamut ban pynieng ha kane ka MDC Election kaban sawan. Nga thoh hangne kat kum ka jingpeit bad jing ïoh-i jong nga ïaka jinglong jingman hapoh kane ka Ri Khasi Jaiñtia jong ngi bad khamtam eh hangne hapoh Jaiñtia. Lehse ka lah ban long kum ka jingai jingmut ïaka party hi ruh.
Katkum ka jingshem jong nga, ki briew ki peit ïaki lai tylli ki bynta haka election kata ïaka party ia u candidate bad ïaka pisa. Kumta ngi dei hi ban jied ïa u kyrtong uba stad ba shemphang u ba la ïoh jingithuh bad jingshaniah naka imlang sahlang bad vkhamtam eh nakato ka Constituency kaba u ïakhun. Hooid, kum ka Party hi kam jied ïa u briew uba donspah ban pyniakhun election , lymne ïaid daka bor pisa ban pynjop election, hynrei wat la katta ruh ka pisa ka donkam hi naka bynta ka jingïaid lynti. Kumba khwai dohkha lada pynngam tang u khwai suda te lada ïeh daki bnai shapoh um ruh ka dohkha kam dait , donkam hi ban suh jingbam kumta haka Election ruh donkam hi ka pisa ban leh iaka ba donkam hynrei ym ban thied ne pynbeij ïa u paitbah.
Haba peit hapoh Jaiñtia, ngam lah ban ïadon lang ha baroh ki jingïalang jong ka VPP bad peit kiba kumno ki briew kiba wan sha kane ka jingïalang bad kiba pynïasoh ïalade sha kane ka Party. Hynrei haka jingshemphang jong nga ïaka jinglong jingman jong ki briew hangne ha Jaiñtia te ka khampher ban ïa shapoh Khasi. Hangne ha Jaiñtia te don ki briew kiba arsap kiba buit tuh bad kiba long bymman ka jingmut jingpyrkhat kum kine ki briew te ki ap kmang bad khmih lynti kumno ban ïoh lad ïoh lynti ban ïoh pisa ïoh nam ïoh burom ei daka buit sianti bad buit sniew. Kumta, haba wan ki briew thymmai ki party thymmai ki seng thymmai khamtam ki bym pat tip bym pat bna ïaka jinglong ka akor jong ki te dei maki kiban leit rap nyngkong bad leit snoh nyngkong. Kum kine ki briew ki stad bad pnah thylliej bha ban kreh ban pynbieij briew. Nga sheptieng ba haka party VPP ruh ïoh ba kin long dkhot nyngkong lane founder members jong ka.
Kumba phi khwai dohthli khwai dohkha, wei bala wan mih nyngkong da ki tham te lada phi khwai katno katno ruh ki dohthli dohkha te kim wan shuh. Te haka party ruh wei bala ïoh pynïasoh ne long dkhot nyngkong da kum kine ki jait briew te kiba bha kiba hok ba shida te kim wan wan shuh.
Ym ba nga pynrem ïaki sengbhalang, manga ruh nga dei u sengbhalang hi, tangba baroh ngi tip kiba kumno ki jait sengbhalang kiba ngi long hangne ha ri Jaiñtia. Ngi long kita ki bseiñ kiba pynkylla bih ïaka dud. Ngi long sengbhalang tang ban ïoh lad ïoh lynti ban pynjot ïaka imlang sahlang ka ri bad ka jaitbynriew.
Kumta, kum kine ki reiwsniew riew jaituh ne riewbymman ki shait don haki sengbhalang bad dei kum kine keiñ kiba shait bit bad shah boi nyngkong kum ki skaiñ haki dohpyut.
Kum ka party, kaba don ki nongïalam kiba proh jabieng kiba stad ba shemphang te ki dei ban long ruh kiba stad bad sian ban jied ïaki nongïalam bad ki kyrtong hakane ka election MDC, ym ban shu peit lymne shu ngeit tang haka jingpnah thylliej ki briew kren hynrei dei ban peitthuh bha ïaka jinglong ka akor bad ka kam jong ki.
Kyrmen ba ka VPP kan sei bun ki MDC haka Khasi Hills Autonomous District Councils bad Jaiñtia Hills Autonomous District Councils haka sien ba nyngkong jong ka Election jong ka bad wanrah shibun ki jingkylla haka ri bad ka jaitbynriew.