Ki stad wad bniah ki la ai jingmut ba ka Vitamin B3 ka lah ban long ka atiar kaba bathymmai ha ka koit ka khiah kaba ïaleh pyrshah ïa ki khñiang jingpang ba shyrkhei kum kata ka MRSA. Ki stad wad bniah ka US ki la shem ba ka Vitamin B3, ïa kaba la tip ruh kum ka nicotinamide, ka pynkhlaiñ bor ïa ki Immune Cell (kita ki cell ba ïaleh pyrshah ïa ki khñiang jingpang) na ka bynta ban pynïap ïa ki khñiang jingpang Staphylococcus. Ka B3 ka kyntiew ruh ïa ka jingdon ka bor treikam jong ki neutrophils, kiba long kita ki white blood cells ba pynïap ïa kita ki khñiang ba don jingma
Ka jingwad bniah, ha ka Journal of Clinical Investigation, ka lah ban wanrah ïa kata ka jingkylla ba khraw ha ka rukom ai jingsumar. Ïa kane ka Vitamin B3 la pyrshang ha kita ki briew ba ïoh ïa ki khñiang jingpang Staphylococcal infections, kum ka MRSA (Methicillin-resistant Staphylococcus Aureus) kaba long kata ka jingpang ba shyrkhei bad lah ruh ban poi shaduh u pud ka jingiap. Kum kine ki jingïohpang la shem hapoh ki hospital bad ki jaka ba ri bad sumar ïa ki khyllung-khynnah. Kaneka jingpang MRSA ka jur bad roi bha ha ki phatok, ki shipai bad hapdeng ki riew kilan met.
Ki saiantis ki la pyndonkam da kaba ai shibun bha kane ka B3, kham bun ban ïa kaba lah ban ïoh na kita ki jingbam teimet, ha kita ki jingleh test jong ki, ia kiba la pynlong ha ki mrad bad kumjuh ruh ha ka snam jong u briew. Tangba ki stad wad bniah ki la ong ba wat la katta ruh ym shym la don kano kano ka sakhi ban pyni ba kata ka B3 ba ïoh na ki jingbam bad ki dawai kan lah ban iada lane sumar ïa kita ki jingpang ba ïabit na ki khñiang jingpang. Ki stad wad bniah ki la ong ba ka B3 la ïohi ba ka lah ban pynkylla ia ki katto katne ki antimicrobial genes, pynkhlain ia ka bor jong ki immune cell na ka bynta ban pyniap ia kita ki khniang jingpang.
U Prof Adrian Gombart ka Linus Pauling Institute jong ka Oregon State University, uba don bynta lang ha kane ka jingwad bniah u la ong “Kane ka jingwad bniah ka long kaba myntoi haduh katta katta wat lada ngi dang donkam ban bishar bniah bad pynlong ïa ka jingwad bniah ha u briew.
“Ki antibiotics ki dei kita ki dawai baphylla, tangba ki ïakynduh ïa ki jingeh na ka por sha ka por na ka daw jong kata ka bor ialeh pyrshah jong ki khniang jingpang bapher bapher, khamtam eh kita ki khniang jingpang Staphylococcus aureus. Kane ka lah ban plie ïangi ïa ka lad kaba thymmai ban sumar ia kita ki jingpang Staph infections kiba lah ban long kiba shyrkhei bha, bad lehse yn lah ruh ban pyndonkam ia ka ryngkat bad kiwei kiwei pat ki dawai antibiotic ba don mynta”.
