Ka VB-G RAM G ka dak jingkylla sha ka jingpynkhlaiñ ka ïohkam ïohjam ha nongkyndong, Dr. R. Murugesan

Shillong, K’ Lyngkot 30: Ka Press Information Bureau (PIB), Shillong ka la pynlong ïa ka Varta – Media Workshop halor ka phang “Viksit Bharat – Guarantee for Rozgar and Ajeevika Mission (Gramin)” (VB-G RAM G) ha ka sngi Thohdieng ha Shillong Press Club, da ka jingthmu ban pynïasoh ïa ki lad pathai khubor halor ka roi ka par ha ki jaka nongkyndong, ka ïoh kam ïoh jam bad ki sienjam ba ïadei bad ka kamai kajih jong ka sorkar India.
La ïoh ïa ka jingai jingkren ba kongsan na u Dr. R. Murugesan, Director, National Institute of Rural Development and Panchayati Raj (NIRD&PR), Guwahati. U Dr. Murugesan u la ai ka jingkren kaba bniah da kaba buddien ïa ka jingkylla ha ka histori jong ki sienjam pynroi ha ki jaka nongkyndong, ka jingkylla ha ki rukom treikam bad ki prokram jong ka tnad kam pynroi jaka nongkyndong na kaba pynleit jingmut ha ki jingdonkam ba kongsan bad ki jingpyrkhat ryntih ïa ka jingkiew ka ïoh ka kot bad ki lad kiba mih na kane.
U Dr. Murugesan u la batai ïa ka jingïaid shaphrang jong ki prokram ai kam ba siew bai bylla jong ka India, da kaba sdang da ki sienjam ba nyngkong kum ka Rural Manpower Programme bad ka Crash Scheme for Rural Employment, bud sa ki jingïarap ba la buh ryntih kynthup ïa ka National Rural Employment Programme, Rural Landless Employment Guarantee Programme, Jawahar Rozgar Yojana, bad ka Sampoorna Grameen Rozgar Yojana kaba ban jur kumno kine ki prokram ki la nangroi suki suki katkum ka jingkylla ki jinglong jingman ha ka imlang sahlang bad ka ïoh ka kot.
Haba ban jur ïa ki jingduna jong ki jingpynkylla ba nang kiew hapoh ka MGNREGA, u Dr. Murugesan u la batai ba ka Viksit Bharat – Guarantee for Rozgar and Ajeevika Mission (Gramin) Act, 2025 ka pyni ïa ka jingkylla ha ka polisi. U la ong ba kane ka Aiñ ba thymmai ka weng ïa ki jingduna katba ka pynkhlaiñ ïa ka jingpynmih lad ïoh kam, ka jinglong kaba shai, ka jingthmu bad ka jingkitkhlieh. Ka jingkylla na ka skhim jong ka sorkar pdeng sha ka rukom treikam ba la kyrshan da ka sorkar pdeng ka ithuh ïa ka jinglong jong ka ïoh kam ïoh jam ha ki jaka nongkyndong bad ka jingthaw ïa ki jingdon jingem, ryngkat bad ka jingthmu ba la ïalam da ka Gram Panchayat, ka jingkitkhlieh lang hapdeng ka Sorkar Pdeng bad ki Jylla, bad ka rukom ai bynta kaba thikna ban kyntiew ïa ka jingtreikam bad ban ïada na ka jingpyndonkam bakla.
U la batai ba ka Viksit Bharat – Guarantee for Rozgar and Ajeevika Mission (Gramin) Act, 2025 ka weng ïa kine ki jingduna da kaba pynïar ïa ka jingkular ban ïoh kam haduh 125 sngi, da kaba kyntiew ïa ka kamai kajih jong ki longïing, kyntiew ïa ka jingpyndonkam ha ki shnong bad pynduna ïa ka jingwan buhai shnong namar ka jingeh.
U la ïakren ruh shaphang ki jingeh kiba ïai bteng jong ka jingbym ryntih, ka jingduk, ka jingbym donkam don jam bad ka jingkyntiew kyrdan ha ka imlang sahlang ha ki jaka nongkyndong jong ka India, bad u la batai ïa ka jingkylla jong ki prokram ba kongsan jong ka tnat kam pynroi jaka nongkyndong, kynthup ïa ki bynta ba kongsan bad ka kam jong ka MGNREGA. Nangta u la batai bniah kumno ka Viksit Bharat – Guarantee for Rozgar and Ajeevika Mission (Gramin) ka tei halor kine ki sienjam, da kaba weng ïa ki jingduna kiba la don lypa lyngba ka jingpynïar ïa ka jingkular ban ïoh kam ïoh jam, ki rukom treikam ba kham khlaiñ bad ka jingshai kaba kham bha, kaba ïahap bad ka jingthmu jong ka Viksit Bharat @2047.
Ka Pavni Gupta, Joint Director, PIB Guwahati, ka la ai jingkren ruh ha kane ka jingïalang bad ka la ong ba ka Viksit Bharat – Guarantee for Rozgar and Ajeevika Mission (Gramin) kadei kaba la wanrah dang shen, bad ba ïa ki skhim sorkar bad ki aiñ la ju bishar bad pynthymmai man ka por ban pynthikna ïa ka jingbteng jong ki ban ïadei bad treikam. Ka la ong ba ki rynsan kum kane ka jingïalang ki ai ka jaka kaba kongsan ban weng ïa ki jingeh lyngba ka jingïakren kaba bniah bad ka jingïakren kaba don jingmut. “Ym donkam ban khuslai shaphang ki jingpynkylla ba la wanrah; kine ki jingpynkylla ki ïahap bad ki jingdonkam ba mynta bad ki thong jong ka roi ka par jong ka ri,” ka la bynrap shuh shuh.
Ha kane ka jingïakren, ki riew shemphang ha ki kam pathai khubor ki la ïamir jingmut halor kane ka skhim ba la tyrwa, ka jingkhmih lynti ban pyntreikam ïa ka ha Meghalaya, bad kumno kan ïapher na ka prokram ba la dep. La ïasam ïa ki jingai jingmut halor ban pynkhlaiñ ïa ka skhim bad ban pynïar ïa ka jingktah jong ka ha ka kamai kajih ha ki jaka nongkyndong.
Ha kane ka jingïalang la wan ban ïashim bynta da ki ophisar na ka Tnad Information and Public Relations (DIPR), ki dkhot jong ka Shillong Press Club, bad ki nongthoh khubor na Shillong.
Ka Viksit Bharat – Guarantee for Rozgar and Ajeevika Mission (Gramin) VB-GRAMG Act, 2025 ka pyni ïa ka jingpynkylla da ka aiñ kaba bniah ïa ka MGNREGA, kaba thmu ban pynïahap ïa ka ïoh kam ïoh jam ha ki jaka nongkyndong bad ki thong pynroi ba jrong samoi, katba ka pynkhlaiñ ïa ka jingkitkhlieh, ki jingmih na ki jingdon jingem bad ka jingshngaiñ ha ka kamai kajih.