Ka Umngot kam dei tang ka wah jong ka Meghalaya hynrei jong ka pyrthei bad ki briew: Lahkmen

Shillong, K’Lyngkot 08: U Bah Lahkmen Rymbui uba dei u myntri sorkar, u la pynpaw ka jingsngewnguh ïa ka sorkar kmie bad kumjuh ruh ïa ka sorkar jylla kaba la buh hakhmat eh ban pynheh ïa ka surok na Shillong sha Dawki.
U bah Rymbui u la ong ba lada kane ka projek surok ka la dep bad ka jinglong jingman ha Bangladesh kan wan biang ka shongsuk shongsain, kan don ka jingshalan bad khaïi na Meghalaya sha katei ka ri.
U la ong, ha ka por ba dang shna ïa kane ka surok ka long kaba eh eh ban ïada na ka jingpynjaboh ïa ki wah wat haba u la bynrap ba ym dei ban don ka jingbym shim khia ne ka jingpynkhein kaba paw pyrthei da ka tnad ba pyntreikam ïa kane ka surok.
“Hynrei ha kum kine ki jait jingpyntreikam ïa ka projek kan ktah ïa kaei kaei ne ïa kawei pat,” ong u Rymbui.
U Bah Lahkmen u la kdew ba katba dang shim ïa ki lad jingiada, kata ka jingktah kan long tang shipor bad lada ym shim ïa ki lad jingiada ka jingjulor ïa ka mariang kan long kaba neh bad kan long kaba ma ïa ka ioh ka kot jong ki paidbah kiba ïoh jingmyntoi na ka kam jngohkai pyrthei kum – Shnongpdeng, Darrang bad Dawki.
“Ka Umngot kam dei tang ka wah jong ka Meghalaya, ka dei jong ka pyrthei bad ki briew, man la ka por ba ki wan sha Meghalaya ki da buh kum ka phang ban leit jngoh ïa ka um kaba khuid sngur bha kaba lah ban ïohi lyngba ne kum ka (crystal clear water” jong ka wah Umngot,” la bynrap biang u bah Rymbui.
U la pynpaw ba ka jylla kam kwah ban duh noh ïa ki um kiba khuid bha jong ka jylla Meghalaya haba pyntreikam ïa ki skhim pynroi.