Shillong, Jylliew 02: U Myntri ka tnat ki kam bording ka sorkar jylla u AT Mondal u la ong ba ka jingduna um ha pung Umïam ha une u snem ka long kaba ym pat ju jia koit ha ka history jong ka jylla bad kumjuh ruh ha ka history kane ka jaka pynmih bording.
“Ka jingdon um ha Umïam ka la duna shaba palat liam bad ka jingjyliew ka um ka don sa tang 3.170 phut bad lada ka hiar sa tang 5 phut ka la dei ka jingeh ia ngi,” ong u Mondal haba kren sha ki lad pathai khubor.
U la ong ba dei na ka daw ka jingduna um ba ka jingpynmih bording ka duna shaba palat pud.
U la iathuh ruh ba na ka liang ka sorkar ka la pyrshang ban wad ia ki lad ki lynti na bynta ban weng ïa kane ka jingduh bording ha ka jylla ‘lehse da kaba wanrah da ki projek kiba thymmai bad ïa kane lei ngin pyrshang ban pyndep noh kloi katba lah,’ u la ong.
U Mondal u la ïathuh ruh ba ka jingpynmih bording ka duna shaba palat pud lada nujor ïa ka jingdonkam bording ha ka jylla.
“Man ka sngi ngi donkam 6.6 ne 7 million unit ka bording katba na ka jylla ngi lah ban pynmih tang 1.5 million unit ban pyndap ïa ka jingdonkam ngi hap ban shu thied beit ïa ka bording,” u la ïathuh.
Haba kylli ïa ka pisa kaba ka sorkar ka la pynlut ban thied bording u Mondal u la ong ba un ym lah satia ban ai ïa ka jingtip namar ka dor kaba thied bording ka kylla man ka kynta ‘dei tad ynda ngi la shim jingkheiñ lut ngin sa lah ban ai jingkheiñ hynrei ïa mynta ngam pat don ka jingkheiñ ha kti jong nga,’ u la ong.
Haba ïadei bad ka hukum ba dang shen ka High Court, u Mondal u la ong ba ka sorkar ka ai burom ïa ka kashari kaba la ai jingbthah ba ngin thied bording na kiwei pat ki jaka pynmih bording. “Haba ngi thied bording ha ka dor kaba heh ngim ju shim bai bording na u paidbah ha ka dor kaba heh kumba ngi thied hynrei ka sorkar ka hap ban buria namar ïa ka dor jong ka bording ban sam sha u paidbah ym dei ba buh da ka MeECL ne ka tnat bording hynrei da ka State Electricity Regulatory Commission,’ u la ong.
