Ka um ba khuid, ka mariang ba itynnad, ki dawai kynbat ka Meghalaya ka dei ka jaka ba biang tam ha NE: Lat

Nongpoh, K’Lyngkot 09: U Lat ka jylla Meghalaya u CH Vijayashankar u la ai ka jingïaroh ïa ka jylla Meghalaya haba leit ban plie paidbah ïa ka Golden Jubilee jong ka ICAR Research Complex ha Umïam namar naduh ba u wan ban shimti kum u lat ka jylla u ïohi ïa ka jinglong kyrpang jong ka jylla Meghalaya napdeng baroh ki jylla ha ka thaiñ Shatei Lam Mihngi.
“Lada phi kwah ïa ka um kaba khuid, ka mariang kaba itynnad, ka jaka jong ka Ayurveda bad ki dawai kynbat, ki riti dustur bad ki kolshor tynrai ka jylla Meghalaya ka wan ba nyngkong ha ka thaiñ Shatei Lam Mihngi” ong u Lat ka jylla.
U CH Vijayashankar u la pynpaw ruh ba u dei na ka jylla Karna kata ka jylla kaba ki rep ïa u shynrai, hynrei ka jylla Meghalaya ka kham khlaiñ ban pynmih ïa u shynrai ba kham bha, bad ym tang u shynrai, naduh u sying, u kba u khaw ka jylla Meghalaya ka dei shisha ka jylla kaba la kyrkhu bad katba thung ki long bad ki heh ki san namar ka jinglong jingman jong ka mariang.
Shuh shuh nalor ka jinglong kyrpang jong ka jaka, ki kolshor tynrai, ki riti dustur, haba shang kylleng sawdong ka jylla ñiar ban shem ba don ki nongkhrong na ki jaitbynriew kiba shong ba sah ha ka jylla.
Namarkata u lat ka jylla u la ïaroh hakhmat u Myntri ka sorkar pdeng, bad ki riew rangbah na kylla ki jaka kiba la wan ha katei ka sngi ïa ka jinglong kyrpang jong ka jylla Meghalaya kaba la sdang ruh ban kiew ha ka kam jngohkai pyrthei bad long ruh kawei na ki jylla kaba la don hakhmat jong ka list jong ki jylla ba kiew bha ka kam jngohkai pyrthei.