Ka UDP kan ïai pyrshah beit ïa ka jingthmu plie ïa ki ïing khalai Casino ha jylla: Allantry

Shillong, Nailur 23 : U Vice President jongka UDP u bah Allantry Franklin Dkhar u la ong ba ka seng UDP kan ïai ïeng pyrshah beit ïa ka jingthmu ka sorkar ban plie ïa ki ïing khalai Casino ha kane ka jylla Meghalaya.
U la ong “ Ka jingai Provisional Licence sha ki lai ngut ki briew ruh ym shym la wanrah hapoh ka kynhun myntri bad la tip ïa kane dei tad hadien ba la wat bniah RTI da ki seng bhalang bad sei madan ïa kine ki jingshisha”.
Haba la kylli balei pat ka UDP ka dang kyndit bynriew haduh mynta khamtam hadien ba ka sorkar ka la dep rai ban pynsangeh bad pyndam noh ïa kane ka jingthmu? u bah Allan u la ong hadien ba u Symbud Myntri Rangbah ka jylla u bah Prestone Tynsong u la pynshai ba ka sorkar kan pynsangeh noh ïa kne ka jingthmu ban plie ïaki Casino kum ka party kaba don ha ka sorkar ka la sngap noh, hynrei dei tad haba la poi hapoh ïing dorbar ba la ïathuh ba la dep ai provisional licence sha ki lai ngut ban seng ïa kine ki casino ba ka sa pynkyndit thret ïa ka party.
Halor ka CrPC bad CPC u la ong ka UDP ka ïeng ha ka nongrim ban dawa ba kine kim dei ban treikam ha ki ïing bishar District Council. Namar lada kine ki aiñ ki treikam ha ki ïing bishar District Council kata ka mut ba ka bor bad iktiar jong ki District Council ban ïada ïaki trai ri trai muluk ka la tlot noh. Na kata ka daw u la ong ba ka sorkar ka dei ban pynshai bha ïa ka jingpynbna jongka da kaba pyndonkam ba ïa kine ki aiñ ym dei ban pyntreikam ha ki ïing bishar District Council khnang ban lait na kino kino ki jingshah ïalam bakla hadien habud.