Shillong, Nailar 06: Ka Seng United Democratic Party (UDP) ka la rai ban pynkhreh ïa ka ilekshon sha ka Autonomous District Council (ADC) bad ka la ong ba ka la long kaba la khreh ban ïakhun pyrshah ïa kino kino seng saiñ pyrthei.
Haba kren sha ki lad pathai khubor hadien ka jingïalang jong ka CEC u Nongïalam ka UDP u Bah Metbah Lyngdoh u la ong, “Ngi dang ap ban ïoh jingtip bad lano ka ilekshon ki ADC kan long bad ngi sngew ba ka la donkam ïa ka party ban thaw thymmai ha ka jylla bad kynthup ruh ha ki district bad ki block na kane ka jingpynkhreh.”
“Ngi dang thmu ban khot application ïa kiba kwah ban ïakhun bad kane ka kam ka la dang ïaid mynta. Ngi la kyntu ïa ki nongïalam jong ki block bad ki district ban pynshisha ïa ki kyrtong,” u la ong.
Lah ban ong ba ka samoi treikam jong ki artylli ki ADC ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC) la pynjlan sha ka 6 bnai bad shen kan sa kut noh.
Katkum ka jingïathuh jong u, u la ong ba bun na ki MDC kiba mynta ki la kwah ban ïakhun biang ha kane ka elekshon MDC ka ban sa wan na ka tiket jong ka seng.
Haba kylli na ka liang jong u Bah Lyngdoh u la ong ba ki MDC kiba mynta wat la ki don ha ki seng bapher bapher ki la pynpaw ba ki kwah ban ïakhun biang ha kane ka ilekshon MDC da ka tiket UDP. “Ngi dang ïakren halor kane ka bynta hashwa ban shim ïa ka rai kaba khatduh,”u la bynrap.
U nongïalam ka UDP u la kyntait ruh ban kren halor ka jingthmu jong ki katto katne ki MDC ne ki MLA kiba thmu ban leit pynïasoh sha kiwei pat ki seng saiñ pyrthei.
Ha kaba ïadei bad ka jinglong jingman bad ka jinglong diengpynkiang jong ka VPP ïa ki seng riewlum ha ka jylla, u Bah Lyngdoh u la ong, “Ngi long kiba la khreh ban ïakhun bad kino kino ki seng saiñ pyrthei ha kane ka election MDC. Ngin ïakhun da ka bor bad ka jingthmu jong ka seng.”
U la kam ruh ba ka seng UDP bad ka ki paralok ba kynthup ïa ka Hill State People’s Democratic Party (HSPDP) kin ïaibteng ban ïatreilang hapoh ka Regional Democratic Alliance (RDA). “Ngi long kiba shai ba ka kynhun RDA kan ïaibteng,” ong u Bah Lyngdoh.
Na ka liang jong u Bah Lyngdoh u la ong ba ka party ka la rai ba kan ïaid lang bad ki paidbah ban tip balei ki khlem kyrshan ïa ka UDP ha ka MP election.
“Ngi kwah ban tip namar ka la don ka jingshah kynnoh ba ngi la ïatreilang bad ka BJP bad NPP. Hynrei nga ka kwah ban pynkynmaw ba naduh u snem 2018 haduh u 2023, ngi la ïatreilang bad ka NPP bad BJP ha ka sorkar MDA-1 bad ha katei ka por ngi don tang 6 ngut ki MLA bad hadien ka 2023 election, ngi la jop 12 ngut ki MLA kaba mut ba ki briew ki la hun ïa ki rukom treikam jong ka UDP hapoh ka sorkar MDA-1 wat ba la ïalam ïa ka sorkar da ka seng NPP bad ba la kyrshan da ka BJP,” u la ong.
U la ong ba watba ka UDP ka don hapoh ka sorkar kam ju tieng ban pynpaw ïa ki jingeh ba ki paidbah ki ïakynduh. “Hynrei ka seng ka sngew ba ka don ka jingshah ïalam bakla jong ki paidbah lyngba ki lad pathai khubor ki paidbah ne Social Media ha kane ka MP election kaba la dep bad dei halor kane ba ka seng ka kwah ban leit sha ki paidbah ban tip bad ban ïoh ka jingkyrshan jong ki,” u la ong.
Haba ïathuh ba u la leit jngoh ïa ki katto katne ki shnong hadien ka MP election, u Bah Lyngdoh u la ong, “Nga la leit ban kynduh ïa ki katto katne ki nongshong shnong ki la ong ba ha ka MP election la kyrshan ïa kiwei, hynrei ha ka MDC bad MLA election kin ïai neh hapoh ka UDP.
“Kumta nga don ka jingngeit kaba skhem ba ka MP election kan ym ktah ïa ka MDC election naba baroh ka shong ha ka jingshaniah jong ka seng ban pynrung ïa ki kyrtong kiba biang bad ban pynpaw ïa ki jingthmu kiba long ka jingmyntoi ïa ki paidbah ka jylla,” u la ong.
