Mawkyrwat, Nohprah 04 : U bah K. Nongbsaw uba dei u Executive Engineer jong ka PHE Mawkyrwat Division ha kajuh ka por uba dei u Member Secratary District Water Mission, South West Khasi Hills District ryngkat u bah T. Lyngkhoi, Junior Engineer, u bah Steven Wahlang, District Project Manager JJM South West Khasi Hills District ki la hiar jurip ïa ka shnong Nongdewsaw, kaba hap hapoh ka Ranikor Block bad kaba dang hap hapoh ka jingpeit jong ka PHE Mawkyrwat Division ïa ka skhim JJM kaba ïoh pyndep ha u snem 2021.
Kane ka jinghiar jurip ka long kum shibynta ban buddien biang ïa kine ki skhim kiba la dep ban pyntrei lyngba ka JJM ban pynthikna ba ki shnong ki thaw la ki ïoh ne em ïa ka umbam umdih kaba paka.
U Bah K. Nongbsaw haba ai jingkren u la ïathuh ba kane ka dei Retro Fitting Scheme ïa kaba la ïoh ban mang pisa tang ïa ki pipe um kiba don hapoh jong ka shnong Nongdewsaw.
“Kaba sngewtynnad ka long ba kane ka shnong Nongdewsaw ka dei kawei na ki shnong kaba pahuh um hapoh ka distrik namar ka tyllong um jong ka ha kaba ka dei ka ‘Gravity Source’ kaba ki ïoh ïa ka um baroh 24 kynta”, ong u bah Nongbsaw.
Ym tang katta, u bah Nongbsaw ula ïathuh ruh ba ka um hapoh kane ka shnong Nongdewsaw ka long kaba bit ban dih bad kaba lait na ki khñiang jingpang ha kaba ki longkmie kiba la ïoh ïa ka jinghikai na ka ophis PHE man ka por ki ju test ïa ka um bad kaba sngewtynnad ka long ba ka um kaba ki la dep ban test ka long kaba shngaiñ ban dih.
