Ka TSA ka dei kawei na ki shlem pynïoh kam ïa ki samla ba tlot ka ïoh ka kot: M. Kharkrang

Shillong, Naitung 10: Ka Tornado Security Agency (TSA) kaba don ha Mawlai Mawïong, Shillong, ka la dei kawei na ki slem ai jinghikai ïa ki samla kiba khlem kam khlem jam bad kiba wan ruh na ki longïing kiba duna ka ïoh ka kot.
Kane ka jaka ai jinghikai Security kadei kaba la seng da u Bah Arnold Lanong ha kaba bun bha ki samla kiba wan na ki longïing kiba duna ha ka ïoh ka kot ki la ïoh ïa ki jingshah hikai ha kane ka kam Security.
Ha ka prokram ka Passing Out Parade jong ka kynhun kaba 14 kiba la pyndep ïa ki jingshah hikai la leit ban sakhi lang da u Rangbah Shnong ka Riatsamthiah u Bah M Kharkrang ha kaba na ka liang jong u, u la pynpaw ïa ka jingai khublei ïa kane ka shlem ai jinghikai kaba plie lad ruh ha ka jingai kam aijam sha ki samla ba wan na ki longïing bat lot ka ïoh ka kot.
Haba shim bynta ha kane ka Passing Out Parade, u Bah Kharkrang u la ong, “Nga ai ka jingïaroh kaba khraw ïa kane ka shlem ai jinghikai kaba la plie lad ban ai kam ïa ki longïing kiba tlot ka ïoh ka kot ka imlang sahlang bad ka long shisha kaba phylla ban ïohi ba kine ki samla shynrang bad kynthei ki la shah hikai na ka jinglong riew paidbah sha ki kam ïada ka imlang sahlang kiba don ka discipline kaba ïalam ïa ki ban trei hok bad ban ong em ïa u drok.”
U Bah Kharkrang u la leit ruh ban ïasyllok bad ki kmie ki kpa bad ki bahaïing hasem jong ki khynnah samla kiba la pyndep ki jingshah hikai ha kaba bun dei kiba wan na ki longïing kiba duk ba kyrduh ka ïoh ka kot.
“Wat hapdeng ki jingkyrduh ki kmie ki kpa ki la lah pat ban phah leit pule ïa la ki khun bad ban pynrung ïa ki ha ki jaka pule ka sorkar pdeng kaba ai lad ïa ki ban pyndep ïa ki jingpule ba lyngkot ne short term course bad hadien ba ki la pyndep ki la ïoh ki jaka ba kin trei,” pynpaw u Bah Kharkrang.
U Bah Kharkrang u la pynpaw ruh ka jingsngewsih ba watla ki don shibun ki skhim ba la ai da ka sorkar pdeng hynrei bun na ki nongshong shnong ki duh ïa kine kiba lah ban kyntiew ïa ki lad kamai kajih ba donkam manla ka sngi.