Shillong, Naitung 31: U nongïalam ka liang pyrshah u Mukul Sangma u la pynthikna ïa ka jingangnud ka Trinamool Congress (TMC) bad ki kam ki ba ka shim na ka bynta ban shakri ïa ki paidbah bad ong ruh ba ka party ka ïeng na ka bynta ka bha ka miat ki paidbah.
Haba kylli shaphang ka lawei jong u bad ka party, u Sangma u la ong ba ka kam ba shakhmat jong u ka dei ban jubab ïa la ka jong ka kamram bad ban pyndap pura ïa ka jingkitkhlieh ban shakri ïa ki paidbah bad ban ïada ïa ka bha ka miat jong ki.
“Nga don ha TMC bad kum ka party ha ka jylla Meghalaya hapoh ka Ïingdorbar jong ngi ka long ban shim ka jingkitkhlieh. Ngi hap ban peit barabor ïa kawei ka kam la ngi don ha ka sorkar ne ka liang pyrshah, ka kam jong ngi ka shad pyllun ha ka bynta ban shakri ïa ki paidbah. Namarkata ka kam ba hakhmat kadei ban jubab ïa la ka jong ka kamram bad ban pynpura ïa ka,” u la ong.
U Sangma u la pynpaw ïa ka jingpyrshang ka party ban pynkhlaiñ ïa ka jingdon jong ka ha ka jylla da kaba ong, “Kumta ban pyrkhat ban pynïasoh bad kawei pat ka party kam lah ban long. Ngi pyrshang ban pynkhlaiñ ïa kane ka political party kaba dang don kaba ngi long dkhot.”
Haba ong ba un sa khmih ïa ka jingmut jong ki paidbah ka jylla, u Sangma u la ong, “Nga don ka jingïasoh bad ki paidbah bad nga tip kaei kaba don ha ka jingmut jong ki kumta ngan sa peit ïa kane ka kam naba ka jingkitkhlieh jong nga ka dei ban shakri ïa ki paidbah.”
“Ïa nga ki la ai kane ka lad kumta nga long uba kmen bad nga ai khublei ïa ki paidbah,” u la bynrap.
Halor ka jingkylli, u Sangma u la kubur ba ka party ka khlem da la lah ban trei shitom ban pynkhlaiñ ïa ka ha Khasi bad Jaiñtia Hills.
Wat hapdeng kine ki jingïaleh, u Sangma u la pynpaw ka jingkyrmen ïa ka lawei da kaba banjur ïa ka jingstad ki paidbah bad ki nongkyrshan ban pynwandur ïa ka party.
