Ka tih dewïong katkum ka stad saïan kan kyntiew ka ïoh ka kot ki nong Jaiñtia: Kyrmen Shylla

Shillong, Naitung 07: U Myntri ka sorkar jylla bad u MLA ka UDP na Khliehriat u Bah Kyrmen Shylla ha ka sngi Nyngkong u la pynpaw ka jingkyrmen ba ka jingtih dewïong katkum ka jingstad saïan kan ïarap ban kyntiew biang ïa ka ïoh ka kot bad ki jingmyntoi ba ki nong Jaiñtia ki la ïoh mynshwa na u dewïong bad ha kajuh ka por ban pynneh tyngkai ïa ka sawdong sawkun.
“Ngi kyrmen ba da ka jingsdang ka scientific mining, kan ai biang ïa ngi ïa kaei kaba ngi dei ban ïoh bad kumno ngi pyndonkam ïa u dewïong naba u dei ka jingai sngewbha U Blei. Ngi dei ban pyndonkam bha ha ka lynti kaba dei bad ha kajuh ka por ban pynneh tyngkai ïa ka sawdong sawkun. Kam dei ban pynjulor ïa ka sawdong ban ïoh ki lad kamai,” ong u Bah Shylla sha ki lad pathai khubor.
U la banjur halor ka jingdonkam na ka bynta ka sorkar ban treilang bad ki paidbah ban pynthikna ba kan don ka jingtyngkai ïa ka sawdong sawkun haba wad ïa ki lad kamai kajih.
U Myntri u la kdew ruh halor ka jingshah ktah ha u dewïong na ka daw ka jingshah khang tih dewïong bad kane ka la ktah bha ïa ki paidbah ka Jaintia Hills, kiba la ïaksaid ban wad da kiwei ki tyllong ban ïoh kamai mynta la palat 10 snem.
“Lah long palat 10 snem ba ki paidbah ki ïakhun ban ïoh da kiwei pat ki lad kamai kajih. Halor kane ka long kaba kmen pat ban ïohi ba ka sorkar ka pyrshang ban kyrshan ha kiba bun ki liang, haoid khlem artatien kam pat long kaba biang hynrei ngi dang kyrmen ba ki jingsynniang bad jingkyrshan ba ngi ïoh na ka sorkar jylla la ka long ban kyntiew ki kam jngohkai ha ki thaiñ jong ngi, kane kan ïarap hynrei kam pat biang ngi kwah kham bun kumba u dewïong u la kyrshan ïa ngi,” u la ong.
“Nga kyrmen ïa u khun u Bah Thomas Nongtdu uba la sdang. Kaei kaba long mynta ngam lah ban tip. Ngi dang peit shakhmat ba kane kan synniang bad ïarap ïa ki briew ka Jaiñtia Hills,” ong u Bah Shylla.