Ka ‘tidew pyrshah ïa ka Sorkar MDA da ki jyrsieh bamsap

Ka Sorkar Meghalaya Democratic Alliance (MDA) ba la ïalam da ka National Peoples Party (NPP) mynta ka kynti ka la shah sangah na ka diang bad na ka mon. Ym tang ka Seng Congress kaba shong ha ka Liang Pyrshah kaba kynnoh laiphew jait pyrshah ïa ka Sorkar MDA hynrei wat ki seng Saiñpyrthei kiba ïatreilang hapoh ka kynhun Meghalaya Democratic Alliance (MDA).
Ha kine ki khyndiat sngi, hadien ba u President ka Meghalaya Pradesh Congress Committee (MPCC) u la kynnoh pyrshah ïa ka Sorkar MDA ba ka donkti ha ki kam bamsap, la mih sa ka United Democratic Party (UDP) kaba la thet kti bad sait khuid ba kam don bynta eiei ha kita ki jyrsieh bamsap ba la kynnoh pyrshah da ka Seng Congress. Ka UDP kaba bat ïa ka tnat Kam Pohing ka thet kti ba kam don jingtip eiei shaphang kita ki ‘High Level’ kiba batbor lut ïa ki kam khaii hapoh ka jylla. U paidbah u sah ha ka umdum bad um don jingshahniah shuh ïa ka UDP. Ka daw ka dei namarba ka UDP kaba bat ïa ka tnat Kam Pohing kam sait kti bad ka len beit ding ding dang dang ba kam don satia kano kano ka jingkhaii tuh ïa u dewiong na Meghalaya shabar ka jylla.
Ki nongniah kali kiba biang lut ki kot ki sla nadong shanong ki ju ud manla ka sngi ba ki la shah dawa pisa ha ki nongkhrong khajna kiba ap ha ki khyrdop kiba don da ki phew tylli ha ki surokbah ha kylleng ka Jylla. Wat ka Joint Secretary jong ka District Council Affairs ka Sorkar Jylla ka la pynmih da ka hukum kaba bthah ïa ki Hima bad ïa ki Autnomous District Council ba kim lah ban pynieng ïa ki khyrdop lum khajna ha shilynter ka surokbah hynrei kine kim patiaw bad la lap ba ka jingmih jong ki khyrdop jong khajna ki don beit kumba ju long. Ym tang katta, wat ki kynhun jong ki seng nongniah kali ki kynnoh ba wat ki Pulit kiba la buh ha surok ban ai jingshngaiñ ïa ki nongleit nongwan pynban ki long pynban ki nongkhrong pisa.
Hato, mano ba hikai ïa kine ki kam dawa? Hato ym dei kiba bat ïa u lakam synshar? Lada ka jingkynnoh jong ka Seng Congress ka long kaba shisha ka Sorkar ka la dei ban thung da ka jingtohkit ban sei madan ïa ka jyrsieh bamsap khnang ba u paidbah un tip mano ba donkti bad kiei kita ki briew kiba don ha ka bor kiba pyndonkam bakla ïa ka bor synshar. Lada ka NPP ka kwah shisha ba ka jylla Meghalaya kan lait na ka bamsap ka bampong ka ladei ban thung noh mardor ka jingtohkit kaba laitluid ka ban khlieh da u nongbishar la shongthait jong ka High Court khnang ba ki jingshisha kin dup paw pyrthei.
U paidbah hi u la ngiah bad u la jlep hi shoiñ namarba kat shaba phai kut ki kam la knieh lut da kita ki ‘High Level’ kiba don ïa ka bor ka itktiar katba u paidbah uba im kamai jakpoh na ka khaii ka pateng bad kiwei kiwei ki jait kam ki duhnong lut nadong shadong hadien ba ka ingbishar ka la pynmih da ka hukum ba ym lah shuh ban dang tih shyiap, ban tih maw. Kam long kaba suk ïa kiba trei da ki kam lajong haba ki ngat ha kane ka apot.
U Conrad Sangma bad u Bah Prestone Tynsong, ki nongïalam jong ka NPP ki sait khuid beit ba ki jingkynnoh ki dei tang ki jingkynnoh ba la jan ka elekshon bad ba ki nongkynnoh ki dei ban da sei bad ki sakhi ki sabut ban pynskhem ïa ki jingkynnoh. Lehse u nongkynnoh ruh um dei uba matlah ban shu kynnoh tuh ïa u briew khlem da don ki jingshisha.
Ki jingshisha kin sa paw pyrthei ynda ka Congress ka la pynmih ïa ki jingdkoh treikam jong kane ka Sorkar ba mynta hapoh ka jingïalam jong ka NPP bad ba u paidbah un sa bishar la ki long neem ki jingkynnoh ba shongnia bad ba don nongrim.
Wat ka BJP kaba ïatreilang hapoh ka Sorkar MDA ka ïai tynruh ïa ka Sorkar ba ka jyrsieh bamsap ka la shyrkhei bad ka la thaw da ka Central Scheme Monitoring Committee (CSMC) ban buddien ïa ka jingpyntreikam ïa ki skhim ba la bhah da ka sorkar pdeng.
Hynrei kaba lyngngoh ka long balei pat ka BJP ka dang snoh beit rdin ha ka Sorkar MDA ba la ïalam da ka NPP haba manla ka por ka ïai kdew kti ba ka Sorkar MDA ka dei kaba bamsap. Katba dang ïa bamja lang na kajuh ka pliang ka paw biej haduh katta katta ban shu kynthoh. Ka jingkynnoh bad ka jingkynthoh ka long tang ban shu tap eitmiaw ïa la ka jong ka iwtung bad ban theh kti beit ïalade.
Ka PDF bad ka HSPDP ruh kiba kyrshan ïa ka Sorkar MDA ki long tang ki Niangkohnguh bad kiba shu ïaroh beit ïa ka Sorkar, namarba kim nud saham eiei ruh em ba ki duna paid bad tang shu bakla ki la shah kynjat sharud na ka daw ba ka NPP ka dei kaba la bun paid bha hapoh ka Sorkar.