Ka thong ka NERIE ka long ban ym don ki khynnah kiba iehnoh ki jingpule shiteng por: Sanjay Kumar

Shillong, Naitung 15: U Sanjay Kumar, IAS, Secretary, Department of School Education & Literacy, Ministry of Education, ka sorkar pdeng ha ryngkat bad u Prof. Dinesh Prasad Saklani, Director, NCERT, ki la wan jngoh ïa ka North East Regional Institute of Education (NERIE), Shillong.
Ha kane ka jingwan jngoh la pynlong ka prokram ba lyngkot ha kaba Prof. Flourette G. Dkhar, I/c Principal, NERIE la pdiang sngewbha ïa baroh kiba la shah khot sngewbha. Na ka liang u Swapnil Tambe, IAS, Secretary, Department of Education, ka sorkar jylla u la ïaroh ïa ka jingnoh synniang ka NERIE halor ban kyntiew ïa ki kam hikai bad kumjuh ruh halor ki kam jingtei.
U la ïathuh ruh halor ki jingtyrwa jong ka sorkar jylla ba kynthup ïa ka rationalisation ïa ki skul khnang ban pynbha ïa ka pule puthi.
Katba Prof. Dinesh Prasad Saklani u la ïathuh shaphang ki jingjop ka NCERT halor ka pule puthi ha ki skul bad batai ruh halor ka thong ban kyntiew ïa ka rukom hikai ha kane ka thaiñ lyngba ka NERIE. U la kren ruh shaphang ka jingdonkam kyrkieh ban pynïar ïa ki lad jingtei hapoh ka NERIE khnang ban pynlah ïa ki jaka pule ban kynduh ïa ki jingdawa kiba mih halor ka pule puthi ha kane ka thaiñ.
U la pynpaw ïa ka jingkwah jong u ban ïohi ba ka NERIE kan don ka jaka kaba biang bad ki lad ki lynti khnang ba kan lah ban trei kumba long kiwei pat ki Regional Institutes of Education.
Ha ka jingkren kum u kongsan, u Sanjay Kumar, IAS, u la banjur da kaba ong ba ka thong jong ka tnat ka long ban pynthikna ba ym dei ban don ki khynnah kiba la iehnoh ïa ka jingpule ne ka jingpep skul shiteng por.
U la ong ba tang da ka attendance kam pat long kaba biang, hynrei ban pynthikna ba ka jingnang jingtip kan dei ban don ka nongrim bad kaba mih na kane ka long kaba kongsan. U la ruid dak ruh halor ka jingdonkam ka pule puthi ban pynwandur ïa ki samla pule ban long ki riewkhraw pyrkhat kiba tbit kiba lah ruh ban synniang sha ka imlang sahlang kaba don jingmut.
U Kumar u la ïaroh ruh ïa ki kam ka NERIE ban ai ka jinghikai ha ki nonghikai bad kyntu ïa kane ka jaka pule ban kyntiew ïa ka jingdon kiba pule B.Ed. bad ban sdang ïa ka Four-Year Integrated Teacher Education Programme (ITEP).
U la ai ruh ka jingkyrshan ban thaw ïa ka Demonstration Multipurpose School (DMS) ha NERIE, naba kane ka la don ruh sha kiwei ki Regional Institutes of Education (RIE). U la banjur ruh ïa ka jingdonkam ban pynrung ïa ka pule puthi ka ban hikai sengkam (vocational education) naduh ka klas ba 6 shaneng bad ka jingdonkam ban pynkhlaiñ ïa ka jingïadon bynta ka NERIE bad ki sorkar jylla jong kane ka thaiñ shatei lammihngi.
Kaba kongsan eh ka long ba na ka liang u Sanjay Kumar u la kyrpad ïa ka sorkar jylla ba kan pynïoh ka jaka khnang ban lah pynïar ïa ki jingtei jong ka NERIE. U la ong ban dup lah kynduh ïa ki jingthmu jong ka NEP 2020, ka long kaba donkam ban pynïar ïa ka shnat treikam kane ka jaka pule khnang ba kan lah ban pynkhreh ïa ka jingdon ki nonghikai kiba la shah pyntbit ha kane ka thaiñ.
Ïa ka prokram la pynkut da ki kyntien ai khublei na Prof. Subhas Chandra Roy Dean (Instruction), NERIE. La pynbud pat da ka jingplie ïa ka Kanaklata Girls’ Hostel bad ka NERIE Guest House.