Ka thong ba la seng ïa ka KHNAM ka la ïoh jaka ha ka VPP bad ngin pynthikna ba kan urlong: Adelbert
Nga sngewnguh ïa u Blei uba la sei ïa u Bah Ardent kum u Nongialam
Shillong, Jylliew 02: U MLA ka North Shillong uba la don bynta ruh ha ka ban seng ïa ka KHNAM bad uba la jop ruh kum u MLA kane ka seng ha u snem 2018 u la ong ba kawei na ki mat ba la seng ïa ka KHNAM kata ban pynkylla ïa ka Reservation Policy ka la ïoh jaka ha ka VPP.
Haba kren bad u Mawphor u la ong ba kawei na ki mat kiba la seng ïa ka KHNAM ka dei ban pynkylla ïa ka Reservation Policy bad u la rung sha ka VPP ruh hadien ba u la ïakren bad ka VPP u la lap ba kane ka mat ka ïoh jaka kum ka thong treikam ka VPP.
“Ki paidbah ki la sakhi ïa ka jingïaid lynti kiba jngai ha ka KHNAM haduh ba la poi u pud ba nga hap ban mih noh bad ha ka jingïakynduh bad ki nongïalam ka VPP nga tyrwa ïa kane ka mat jong ka Resevation Policy ki ruh ki la ïathuh ba ki la buh lupa ïa kane kum kawei na ki thong treikam bad mynta ngi sakhi ba ym tang ba ngi pynrung ha ka jutang elekshon ïa kane mat hynrei ngi pyrshang ban pyndep kat kum ka iktiar ba u paidbah u la pynkup,” u la ong.
Haba ïakren ha kaba ïadei bad ka jingpynbna ka sorkar ban thaw da ka Expert Committee ban pynkylla ïa ka Reservation Policy u Bah Adelbert u la ong, “ka dang dei tang shijam ha ka jingïaid lynti kaba jngai kaba ngi angnud bad kum ka party ngin ïai buddien ïa kane haduh ban da lah ban pynurlong bad nga hap ban ai burom ïa u Bah Ardent uba la shim ïa ka jingkit khlieh kum u nongïalam ban shah thngan ha kane ka jaka bad nga ainguh naduh ka mynsiem ïa u Blei uba la sei ïa u Bah Ardent kum u nongïalam ka party bad ka jaidbynriew hi,” u la bynrap.