Ka Thma Pyrshah Drok : Pyntreikam ïa ka PIT-NDPS Act bad thaw ïa ka tnad ANTF ba pura : NEIPF

Shillong, Nailur 11 : Ka North East Indigenous Peoples’ Forum (NEIPF), Shillong Chapter, kala dawa ïa ka Sorkar Jylla ban pyntreikam noh ïa ka Prevention of Illicit Traffic in Narcotic Drugs and Psychotropic Substances, (PIT- NDPS) Act 1988 ha ka jylla ban lah ratdyngkhong ïa u droks hapoh ka Jylla.
Ka NEIPF kaba kynthup ïa ka seng Federation of Khasi Jaintia & Garo People (FKJGP), Hynniewtrep National Youth Front (HNYF) bad ka Ri-Bhoi Youth Federation (RBYF), ka la dawa ruh ban pynkha noh da ka Tnad ba pura jong ka Anti Narcitics Task Force (ANTF) kumba long ka SB, CID ha Jylla, ka ban khlieh da u Heh Ophisar ba bat ïa ka kyrdan Indepctor General (IG) ka ban peit thik tang ïa ki kam ïaleh pyrshah ïa u droks.
Lah ban kdew hangne ba ha u bnai Jylliew, ka Sorkar ka la pynbna ban thung ïa ka Advisory Board kaban khlieh da u Judge ba la shongthait ka ïing Bishar High Court, ban lah pyntreikam ïa ki kyndon ka PIT-NDPS Act hapoh ka Jylla.
ïa kane la pynbna da u Myntri ka Tnad Social Welfare ka Jylla Bah Paul Lyngdoh hadien ka jingïakynduh bad ki Heh Pulit, haba pyntip ruh ba kat kum ki kyndon ka PIT-NDPS Act, wat ki nongdih bad nongkhaïi kin ym lait na ka jingshah pynshitom da kaba set phatok ym duna ïa ka 3 bnai kaba lah ban pynjlan shaduh shisnem.
Haba ïakren bad u Nongthoh khubor, u Nongaiktien ka NEIPF Bah Dundee C Khongsit, ula ong ba ka Jylla Meghalaya ka la donkam palat ïa ka Aiñ ka ban leh tyngeh ïa ki nongkhaïi ne nongdih droks namar ka jingnang jyllei u drok bad kynrei ki nongdih droks ha manla ki shnong ka Jylla, uba la poi ruh wat sha ki jaka nongkyndong.
“Ngi la sakhi ïa ka jingkiew ki kam sniew khamtam ki kam tuh kam thiem ha manla ki shnong ki thaw. Ki kam tuh ki la jia manla ka sngi ha manla ki shnong haduh ba ki paidbah ki la hap thiah siar ïalade ha ka miet ka ïong. Ka daw hi ka dei namar ba tuh ban ïoh thied droks” ula ong haba bynrap “Ka por kan sa poi ba lada kim ïoh tuh shuh da kaba suk, kin sa poi sha u pud ban rah da ki tiar bad rung jubor sha ki thliew ïing”.
Une u President ka FKJGP ula ong “Kaba sheptieng eh ka long ba suki suki, kane ka kam droks ka lah ban pynkha ïa ki kynhun nongkhaïi ki ban sa pyndonkam da ki kor ki bor ka juk ban lah pynïaid ïew ïa u droks”.
Ha kajuh ka por, u Bah Dundee ula ong “Ka Jylla ka la donkam ban don noh ïa ka Tnad ba pura kumba long ka Tnad SB, CID ka ban ïakhun thik tang ïa u drok ha Jylla”.
Kat kum ka jingong jong u, “Ngi tip ki la don ki Anti Narcotics Task Force (ANTF) ha manla ki District ka Jylla bad ïa kine ki kynhun la khlieh da ki Superintendent of Police (SP), kiba ïakhun ïa u droks hala ki jong ki jong ki District”.
“Ka Jylla kala donkam da ka Tnad ba pura jong ka ANTF ka ban pynïaid na Headquarter ka Tnad Meghalaya Police, ka ban khlieh da u Heh Ophisar ba bat ïa ka kyrdan Inspector General (IG) ban ïakhun ïa u droks” ula ong.
“Mynta ngin hap ban wad ïa ki buit (strategy) jong ki nongkhaïi droks ba wan pynpoi droks ha Jylla. Ngin hap ban jop ïa kine ki buit treikam lym kumta, ka eh palat ban ïakhun ïa u droks lada ngim lah ban tehlakam ïa ka thymmei jong u” ula bynrap.