Ka surok na jingkieng Rilbong Umshyrpi sha Upper Shillong yn pyndep haba kut u 2025

Shillong, Nailar 01: Ka jingtei ïa ka surok four-lane na jingkieng Rilbong Umshyrpi sha Upper Shillong la khmih lynti ban pyndep noh ha shwa ban kut u snem 2025, ïathuh u Symbud Myntri Rangbah ka jylla u Bah Prestone Tynsong.
Ka company kaba pyntrei ïa kane ka project ka la kut jingmut ban pyndep noh ïa kane ka kam wat hapdeng ba mad ki jingeh na ka daw ka jingdon jong ka aïom slap, ïathuh u Bah Tynsong sha ki lad pathai khubor ha ka sngi Thohdieng.
Na ka liang u contractor u la kular ban pyndep ïa kane ka kam ha shwa ban kut u snem 2025, bad ka kam kaba dangsah ka long ban pynkhuid ïa ki jaboh bad kumjuh ruh na ka daw ka jingdon ka aïom slap bad ïa kane u la ïathuh haba phai sha ka package I bad ka surok four lane.
Haba ïadei bad ki package II, IV, bad V, u Bah Tynsong u la ong ba ka tarik ban pyndep na ka bynta kine ki package la buh ban pyndep ha shwa ban kut u snem 2026.
Ïa ka Shillong-Dawki road project, ba la pyntrei da ka National Highways and Infrastructure Development Corporation Limited (NHIDCL), ka la dang ïaid shakhmat bad la khmih lynti ban pyndep ha u Nohprah 2026.