Shillong, Rymphang 15 : U Symbud Myntri Rangbah ka jylla ba peit ïa ka tnad PWD, Bah Prestone Tynsong u la pynpaw ïa ka jingkyrmen halor ka jingïaid shaid shaid ka jingpyntrei ïa ka surok Shillong – Dawki bad ong ruh ba mynta ka jingpyntrei ïa ka surok fourlane ka la jan dep artad.
“Kumba phi ïohi ba ïa ka surok fourlane ka la jan dep artad bad mynta ka la don ha ka bynta ba khatduh ban pyndep,” ong u Symbud Myntri Rangbah haba kren bad ki lad pathai khubor dang shen.
Nangta, katkum ka jingïathuh jong u, ïa ka Pynursla Bypass la khmih lynti ba yn sa ïoh ban sdang noh shen hadien ba ki la ïoh ïa ka jingpyntip na ka NHIDCL.
“La kumno kumno hapoh khyndiat taiew ei ei ka NHIDCL kan sa pynbna noh ïa ka tarik na ka bynta ki kompeni ba pyntrei ban sdang noh ïa ka kam,” u la ong.
Ha ka jingpyntrei ïa kane ka projek la phiah ha ki san bynta, bad bun na kine ki package ka kam ka la ïaid shakhmat.
Na ka liang u Symbud Myntri Rangbah u la kdew ruh ba ka Package – 1 kadei naduh Rilbong ter ter haduh pyrshah Pomlum PHC, nangta ka Package -2 pat ka dei haduh Laitlyngkot bad ka Package IV pat ka sdang na Pynursla.
Dang shen na ka liang u Symbud Myntri Rangbah da lade hi u la leit ban jurip ïa ka jingpyntrei ïa kine ki surok da kaba sdang naduh Rilbong ter ter haduh sharum Pynursla.
