Shillong, Iaiong 4 : U Myntri sorkar bad MLA jongka South Shillong Constituency u bah Sanbor Shullai u la ong ba ka surok bah Shillong-Dawki ka long kaba kongsan tam namar ka long shi bynta na ka Asian Highway ne surok bah ban pynïasoh bad ki ri ka Asia ne ka Pan – Asia Integrated Intermodal Transport System.
“ Kane ka projek surok ka long shi bynta na ka Asian Highway (AH) bad kan long kaba donkam bad kongsan tam na ka bynta ka Pan Asia Integrated Intermodal Transport System” ong u bah Sanbor mynta ka sngi.
“ Tang shu la dep kane ka surok kan suk ka leit ka wan bad ka ri Bangladesh bad kan kiew ka khaïi pateng bar ri ruh kumjuh” ong biang u bah Sanbor.
Lyngba kane ka surok la khmih lynti ba kan kyntiew ïa ka kam jngohkai ha ka jylla namar la suk ka leit ka wan sha Lum Shillong, sha Elephant Falls, Dawki, Cherrapunji bad Mawlynnong kawei na ki shnong ba khuid tam ha Asia.
Kane ka surok kan pynsuk ïa ki nongwan jngohkai ban leit sha ki jaka leit jngohkai bapher bapher hapoh ka jylla.
Kane ka surok kaba jrong 71 KM naduh Shillong haduh Dawki ka long kaba kongsan bad kaba la pynheh ban ïaid ar tylli ki kali naduh hynniew mer shaduh Dawki bad na Shillong haduh 7 mer pat la shna ban ngiam ïaid 4 tylli ki kali ha kajuh ka por. Ka jingmang ïa kane ka surok ka long 2,161 klur tyngka kata kynthup ïa ka jingsiew bai jaka puta. Lah phiah ruh ïa ka ha ki 5 bynta kata ïa ki 4 bynta (package) la dep mang pisa naduh u 2020 bad ka jingtrei ruh ka la ïaid.
Kane ka projek ka la kham slem noh ban sdang namar ka jingslem ban ïoh ïa ki jaka na ki trai jaka puta. “ Hynrei da ka jingïai bud den la lah ban ïa pynbeit bad ïoh ban sdang ïa kane ka projek ha u 2022 haduh u Jymmang 2023 ter ter. Ka bynta ba nyngkong ka dei na Silbong sha Mylliem ha kaba ka kam ka la jan dep artat namar kumba 90 % la dep pyndep ïa ka jingshna. Ka bynta ba san naduh Umsyiem shaduh Tamabil kynthup ïa ka Jingkieng Dawki la khmih lynti ba yn lah ban pyndep ha u 2027 bad ka bynta ba lai ka dei ka Pynursla By Pass bad ïa kane yn sdang shna noh mynta u bnai Iaiong bad yn pyndep ha u 2028.
