Nongpoh, Ïaiong 30: Ka tnad pulit traffic jong ka Nongpoh kiba ju peit pyrman bad ai jinghikai sha ki paidbah halor ki aiñ ñiah kali, naduh ki ar sha ka haduh ki trok heh ban lait na ki jingjia aksiden khamtam ka jingduh jong bun ki mynsiem briew na ka daw ka jingñiah thurmur ïa ki kali bad ki ar sha ka, mynta ka sngi ki la bteng ban ai jinghikai ïa ki trok ba kin tip na kano ka liang ban ïaid haba ki ñiah ha surok bah 4-lane jong ka National Highway-6.
Na ka liang ki pulit jong ka Nongpoh Traffic Police ki la lum ruh ïa ki nongñiah trok ban pynshai sha ki khnang ba kin tip kumno ban ñiah ha surok bah National highway kaba dei ka lynti kaba kylluid hynrei ka jaka ruh kaba ma na ki jingjia aksiden ha kaba kum ki pulit ki la pynshai ba ki trok bad ki kali ki dei beit ban ïaid na ka liang ka diang jong u surok, lait noh tang ha ka por ba ki mut ban shim pass ba ki lah ban ïaid na ka liang ka kamon namar kane kan pynsuk ïa ki kali ba kham kyrkieh kum ki kali kit nongpang bad kiwei kiwei.
Haba kren sha ki lad pathai khubor u Bah B Thangkhiew uwei na ki pulit ophisar ka tnad Traffic ha Nongpoh u la ong ba ka Ri-Bhoi ka dei ka jaka ba bun bha ki jingjia aksiden na kadaw ka jingñiah thurmur palat ïa ki kali bad bun na ki paidbah kim burom satia ïa ki aiñ ñiah kali bad leh katba mon kaba wanrah shibun ki jingjia ba sngewsih, kum ka tnad pulit mynta ka sngi ka la shim biang ïa ka sienjam ban ai jinghikai sha ki nongñiah trok ba kin tip na kano ka liang ba ki dei ban ïaid ha surok ha kaba la ai ka jingpynshai kaba bñiah ïa ki ba ki dei beit ban ïaid na ka liang ka diang jong ka surok lait noh ha ka por ba ki knieh ban ïaid shakhmat ïa kiwei ki kali namar ka liang ka diang kam dei satia ka jaka kaba ki paidbah kin knieh ban ïaid shakhmat.
Kumta na ka liang ka tnad pulit ka kyrpad sha ki paidbah ba ki dei ban sngewthuh ban burom ïa ki aiñ ñiah kali ban ïaid ha ka rukom kaba dei bad ban bud ïa ki kyndon aiñ naduh ki ar sha ka haduh ki kali heh ban lait na kano kano ka jingjia aksiden khamtam ka jingduh noh ki mynsiem ba kordor tang na kadaw ka jingthurmur ka rukom ñiah kali khnang ba kum kitei ki jingjia kim dei ban nang jia shuh nangne shakhmat.
