Wandima-U- Sumer bad Endearing Star Langstang
Ka Society for Urban and Rural Empowerment (SURE), ka dei ka seng trei mon sngewbha kaba shimkhia bha na ka bynta ka roi ka par bad ka jingkylla ha ka imlang sahlang ha ka thaiñ Jaiñtia Hills. Ka dei kaba la sdang ha u snem 1995 kum ka jingthmu ba la ïalam da ki samla ba la tip kum ka Liberal Youth Cultural and Adventure Association (LYCAA) jong ka Balang Unitarian, Jowai, bad mynta ka la kylla long ka seng kaba pyntreikam ïa ki projek bapher bapher ha kylleng ki jaka sor bad nongkyndong.
Ka LYCAA na kaba sdang ka la ïoh jingkyrshan na ka bor synshar District bad hapoh ka skhim jong u Myntri Rangbah ka Jylla kaba peit ïa ka bha ka miat jong ki samla. Wat la ka seng ka la sangeh katto katne snem, hynrei la pynim biang ïa ka ha u snem 2015 da u Rev. H. H. Mohrmen bad ka kynhun ki samla balang. Naduh kata ka por, la pynkylla noh ïa kyrteng jong ka LYCAA sha ka Society for Urban and Rural Empowerment (SURE) bad mynta ka kynti ka la sakhi ïa ka jingroi kaba khraw.
Ka SURE ka don ïa ka ophis treikam ha phylla ka ïing Balang Unitarian, Jowai, ka don ïa ki nongtrei palat 80 ngut. Ka pynïaid ïa ki katto katne ki jaka ba kongsan ba kynthup ïa ka Drop-in Centre, ka Halfway Home kaba peit ïa ki briew kiba don jingduna ha ka bor pyrkhat pyrdaiñ, ka ophis jong ka Link Workers Scheme (LWS) ha Khliehriat, bad ar tylli ki jaka ai jinghikai ha Amlarem bad Jowai.
Ka seng ha kaba sdang ka la sdang da ki jingpyrshang kiba rit kum ka jinghikai shaphang kumno ban kynshew ïa ka pisa tyngka kaba la kyrshan da ka NABARD, hynrei mynta ka la pynïaid ïa san tylli ki projek kiba heh bad ki prokram ai jingïarap kiba bun jait.
Ka thong jong ka SURE ka long ban pynkupbor ïa ki shnong ki thaw lyngba ka jinghikai, ka koit ka khiah, ka jingpynroi ïa ki sap, bad ki rukom treikam kiba lah ban pynneh pynsah. Ka ïaleh ban kyntiew ïa ka jingseng kam seng jam lajong, ka jinglah ban ïoh ïa ka jingsumar, ka jingpynkupbor ïa ki samla, bad ka jingpynroi ïa ka mariang. Ka seng ka pyrkhat ïa ka imlang sahlang kaba ïadei dur ha kaba ki riew shimet ki lah ban ïoh ïa ki lad jingïarap bad jingkyrshan kiba donkam ban poi sha ka jinglah kaba pura.
Ha ka jingïatreilang bad ka North East Slow Food and Agrobiodiversity Society (NESFAS) ka SURE ka la pyntreikam ïa ki ar tylli ki project ba kongsan kiba kynthup ïa ka; “No One Shall Be Left Behind” lane “Ym don mano mano ba shah iehnoh shadien”, kaba la kyrshan da ka Rural Electricity Corporation (REC), Meghalaya, bad ka Agroecology Learning Circles, kaba dei ka projek kaba hikai ban pynneh pynsah ïa ka kam rep kam riang kaba la kyrshan da ka Meghalaya Basin Management Agency (MBMA).
Ka SURE ka dei ruh ka nongpynbiang jinghikai ba la ithuh da ka Meghalaya State Skill Development Society (MSSDS), bad ka la don ka bynta kaba kongsan ha ki prokram sorkar. Ha ka por jong ka jingwan lynshop jong ka khlam COVID-19, ka seng ka la pynlong ïa ki jingpynsngewthuh paidbah bad bteng ïa ki jingshakri ai jingïarap.
Da ka jingthmu kaba kynthup lang, ka SURE ka la shim ïa ki sienjam kiba kongsan ban kyrshan ïa ki briew kiba don jingduna ha ki dkhot met bad kiba duna ka jingïohi, ban pynthikna ba kin ïoh ïa ka jinghikai, ki hok, bad ki lad ïohkam. Ka jingpyrshang jong ka, ka ïaid ruh sha ka jingïarap ïa ki shnong ki thaw ban ïoh ïa ki jingmyntoi bad ka jingbha jingmiat lyngba ka jingïatreilang bad ki tnad sorkar.
Katba ka nang kiew, ka SURE ka dang long ka nuksa kaba bha halor ki jingpyrshang kiba pynshong nongrim ha ka jingngeit, kiba la ïalam da ka imlang sahlang ki lah ban pynkylla ïa ki jingim bad kyntiew ïa ki thaiñ baroh kawei lyngba ka jingaiti, ka jingsngewrit, bad ka jingroi kaba neh.