Ka jingïakhih bad sah miet jong ki nonghikai Adhoc ha kine ki taiew ba la dep ban pynkiew ïa ka tulop jongki, bud sa ka jingïakhih bad sah miet ki nonghikai SSA ban pynbor ïa ka sorkar Meghalaya ba kan siew noh ïa ka ram ba san (5) bnai jong ka tulop jongki ka la pynieng shkor ïa kane ka sorkar MDA ha Meghalaya kaba shu ïoh thiah beit lyngngai man ka por ïa ka pule puthi(education).
Baroh ar kynhun ki seng nonghikai ki la ïakhih da kajuh ka sur kata,da kaba shu shong bad sah miet beit bad miet bad sngi haduh ban da ïoh na ka sorkar ïa ki jingdonkam jongki. Ha ka sien ba la sah miet ki nonghikai Adhoc, u Chief Minister ka Meghalaya u la ai dak (gave a green signal) ba dei ban thaw noh(constitute) ïa kata ka State Education Commission ba kan long ka nongpeit nongbishar bniah ïa ki jingdkoh ba bun jait jong ka rukom pynïaid ïa ki jaka pule(educational institutions) ha Meghalaya.
Hadien ba la sah miet sa ki nonghikai SSA pat, u Deputy Chief Minister u la kren hi ïa kajuh ka sur ban thaw noh ïa kata ka State Education Commission ba kan peit ïa ki jingduna ha ka thoh ka pule baroh bad ba kan ai jingmut pat ïa ka sorkar kumno ban pynkylla dur thymmai ïa ka jingnang jingstad hapoh Meghalaya. Lada ka sorkar ka don shisha ka jingmut kaba khuid bad kaba shisha ban pynthymmai bad wanrah ka jingpynkylla dur ïa ka thoh ka pule,kane ka Commission la dei ban ai kyrteng da ka Meghalaya Educational Reform Commission.
Kane ka Commission kam dei pat ban long ka jaka rieh tngen bad ka jaka ai bai rneng(perks) ïa ki politician ba la shongthait ne kino kino ki nongtrei party kumba ju leh ha kiwei kiwei ki jait Commissions/Corporations/Committees.Lada ka sorkar ka don shisha kata ka jingangnud kaba hok bad kaba bakhuid naduh mynsiem,kane ka State Educational Reform Commission la dei ban khlieh(headed) da uno uno u minister uba bat ïa ka tnat pule puthi(Education Minister).
Uno uno u officer uba bat ïa ka kyrdan Commisioner and Secretary Education pat un long u Member Secretary.Dei ban don lang ki Expert kiba la ju trei bad kiba la long experience (educationists) ha ki kam jong ka tnad ka thoh ka pule(Education).Ym tang katta,ki Principal na ki skul bad College ba kham paw la ki dei na sor ne nongkyndong kidei ban don lang ha kane ka Commission.Katto katne ki DSEOs/SDSEOs ba kham sngewthuh ïa ka kam dei ban pynrung lang ha kane ka Commission. Hynrei,ka sorkar kam dei pat ban klet ne niewbein ïa ki nonghikai na ki kynhun bapher bapher naduh ka kyrdan Primary haduh ki college level na ki jait skul bapher bapher (diffirent school categories) ki dei ban don lang ha kum kane ka Commission namar dei ma ki kiba don shisha ha lyngka trei jong ka thoh ka pule (fields).
Ki nongtrei ha lyngkha ki kham tip bad sngewthuh bha hangno don ki thliew ki syar,ki krem ki kroh bad ki khohruh khohram baroh.Ka jingleh bym salia ka sorkar ban nym kynthup lang ïa kum kine ki jait nongtrei ha man la ki por ba la dep ka la pynphlop noh(failed) ha kiba bun bah ki Commission/Committee.Ka shait bakla shibun ban shu rai ne mutdur tang na Secretariat khlem da tip bha ba ka lyngkha kaba jlih ne madan ka dei pynban kaba khohruh khohram ynda la poi ha shen.Wat tharai ba ki kynhun nonghikai kin shu pyrshah beit kumba khmih lynti ki bor sorkar hynrei kin sa long ki atiar ban maramot,pynkylla dur bad saindur thymmai sha ka lawei ba phyrnai jong ka thoh ka pule ha state jongngi.Wad bad jied shisha da ki briew kiba don sap ha katei ka liang(right persons for the right posts) khnang ban wanrah shisha ka jingkylla dur bak-ly-bak ha ka thoh ka pule.
Lada ka sorkar Meghalaya ka kwah ban shimkhia shisha halor kane, khlem artatien,ka thoh ka pule ha Meghalaya kan nym hiar shuh sha trai hynrei kan kiew sted bad poi kyrdan kham shakhmat ha ka ri India baroh kawei(at the national level).
