Ka Sorkar Pdeng ka dei ban jubab hooid lane em ïa ka jingpan ILP ka jylla : KSU

Shillong, Jylliew 24: Ka Central Executive Council (CEC) ba thymmai ka KSU ïa kaba la pynskhem ha ka sngi Saitjaiñ ka la buh jingkylli ïa ka jingkuman ka sorkar pdeng ban ai ïa ka ILP wat hadien ba ka Ïing Dorbar thaw aiñ ka jylla ka la mynjur ïa ka resolution ban dawa ILP ha ka jylla,
Haba kren ha ka jingïalang pynskhem ïa ki nongkit kam ba thymmai ka seng na bynta ka samoi treikam 2023-26 ïa kaba la pynlong ha Dorbar Hall ka Jaïaw Shyiap- Lumpyllon u President ka KSU u Bah Lambokstarwell Marngar u la ong ba ka jingkren bad leh kyllaiñ ka sorkar pdeng ïa kane ka mat ka pyni ba kam burom satia ïa ka jingpan ka ïing dorbar thaw aiñ ba la pynkup bor da u paidbah ka jylla.
U la ong ruh ba haduh mynta ym tip shano bad haduh katno ka jingdawa ILP ha ka jylla ka la ïaid shakhmat.
“Ki nongïalam ba synshar ïa ka sorkar jylla Meghalaya ki la pynpaw ba ki la ïai buddien ïa kane ka jingdawa ILP bad ka jingkylli ka mih mynta, sa katno snem ngin ïai buddien, sa katno snem ngin ïai ap. Ka kyrwoh kaba shai shaka sorkar jylla bad ka sorkar pdeng ka long, dei ban kren shai, Hoid ne EM halor ka ILP khnang ba ki paidbah ka jylla ruh kin sngewthuh kumno ban ïaid shakhmat” la ong u bah Lambok.
“Katba ka jylla ki dang ap ïa ka jubab Hooid ne Em, na ka liang ka seng kan ïai buddien ïa kane ka jingdawa, la kadei ban ïa mih surok ruh kam seng kam banse ban pynthikna, kaei ka jingpyrkhat jong ka sorkar jylla bad sorkar pdeng haba ïadei bad ka jingdawa ILP hapoh Meghalaya” u la bynrap.
Ula ong ba kumba ïohi mynta ka jingrai jong ka sorkar jylla ban mynjur daka Resolution hapoh ka ïing dorbar thaw aiñ haka 19 tarik Nohprah 2019 ïa ka ILP kadei tang ka jingtheh umpjah ïa ka jingkhih win ki paidbah namar haduh mynta, wat ki bor sorkar jylla kim tip shaei ka lawei ka ILP.
“Ka seng ha ki sngi ban wan kan ïai bteng ïa ki prokram ban dawa naka sorkar jylla ban leit tied jingkhang shaduh ka nongbah Delhi ban ïoh ka jubab kaba shai halor ka jingdawa pyntreikam ILP hapoh Meghalaya” ula ong.
Haba kren sha ki dkhot ka seng bad ki samla ka jaidbynriew u Bah Lambok u la khot ba kin long ki jingsngaiñ bad kiba len lade na bynta ka ri.
“Ngi ïohi ba ki bun bha ki riew ieied ri ha kane ka juk kaba ngi im hynrei katno ngut eh kiba kloi ban len lade na ka bynta ka ri bad ka jaidbynriew bad ka KSU kam ju kop tang ka ktien hynrei ka kam ka la leh bad ki dkhot ka seng ki bun kiba la shah set byni na bynta ka jaidbynriew,” u la ong.
U la ong ruh ba lada peit ïa ka jaidbynriew ka don ka jingshah hiar thma ka jaidbynriew ym shuh da ki tup ki man hynrei da ka rukom pyrkhat thymmai ba khyllah kaba ym don shuh ka mynsiem ïatiplem ïa ka jaidbynriew.
“Ngi ïohi ba ka ju don ka jingsngewpher hapdeng ka jaidbynriew na ka jingsngew thaiñ hynrei kaba ngi i shyrkhei ïoh kane ka rukom pyrkhat thymmai jong ka jingsngewniam kan ïoh rung ha ka rukom pyrkhat ka jaidbynriew bad lada ka jia kumta kan dei ka jingjot kaba khraw ïa ka jaidbynriew”, u la ong
“Ngi sngewthuh ka juk ba ngi im ka jingkylla bad ka juk jong ka jingtyrha bad kane ka jingtynjuh kam wan na shabar hynrei kiba na poh ïing jong ka jaidbynriew, kum ki dkhot ka jaidbynriew ngi dei ban long ba la khreh ban ïatyngkhuh bad kiba kum kine ki jingjia”, u la ong.
Haba kren halor ka jingkyrduh kam ha ka jylla u la ong ba ka sorkar ka la dei ban pykhreh ïa ka Employment Policy ban pynthikna ba ki khun samla kin ïoh kam ym shuh tang ha kam sorkar hynrei wat ha ki karkhana kiba bun kiba don ha ki kylleng ka ri namar kumba long mynta kiba ïoh jingmyntoi ym dei satia ki trai muluk trai jaka hynrei ki briew kiba na bar.
U la ong ruh ba ka sorkar ka dei ban wanrah thymmai ïa ka education Policy kaban hikai ïa ki samla naduh ka por ba ki dang pule ban ieng ha la ki kjat.
Ïa kine ki nongïalam ba thymmai ka KSU la pynsmai da u Bah Samuel B Jyrwa u nongïalam ba rim ka KSU uba dei ruh u nongïalam ba rangbah duh ka NESO ha ryngkat ka jingsakhi lang ki nongïalam barim ka KSU ki riewrangbah bad ki nongïalam na ki seng bhalang bapher bapher.
Ha kane ka sngi ka KSU ka la pynkup burom ruh ïa ki nongïalam ba la rai ban shongthait noh na ka seng bad ruh kumjuh ïa ki dkhot kiba la shah set phatok kum ka jingñiew bruom ïa u synñiang ba ki noh sha ka jaidbynriew lyngba ka KSU.