Ka Sorkar Meghalaya ka dei ban phah kem mardor ïa ki Pulit ba siat briew ha Mukroh: Mukul Sangma

Shillong, Naiwieng, 23: Ka All India Trinamool Congress (AITC) Meghalaya ha ka sngi Balang ka la ong ba ka Sorkar Meghalaya ka ladei ban dawa ïa ka Sorkar Assam ba kan shu aiti da kaba suk ïa ki Pulit kiba donkti ban siat ïap ïa ki san ngut ki paidbah ka shnong Mukroh, West Jaiñtia Hills District bad ban tian bishar katkum ki kyndon aiñ jong ka Criminal Procedure Code (CrPC) bad ka Indian Penal Code (IPC).
Ka AITC ka la pynbna ruh ban ai jingïarap T.5 lak tyngka sha ki bahaing hasem jong ki lanot kiba la duhei ïa ka jingim ha jingshah siat ïap ha ki Pulit Assam.
U Nongïalam ka Liang Pyrshah jong ka AITC u Mukul Sangma ha ka jingïakren bad ki lad pathai khubor u la kynthoh ba ka jingshim rai ka Sorkar ban phah tuklar ha u Myntri ka tnat Kam Pohing u Amit Shah ban tohkit CBI lane ha ka NIA halor ka jingjia ha Mukroh.
“Ka jingjia hangne ka dei kaba shai, ki aiñ jong ka ri ki don, ai ba kin bud katkum ki kyndon jong ka CrPC, IPC bad ban kem mardor ïa kito ki Pulit kiba donkti ha kane ka kam pynïap briew. Ki (Sorkar Meghalaya) dei ban dawa ïa ka Sorkar Assam ba kan aiti ïa kito ki (Pulit) ba donkti ban siat pynïap beiñ,” ong u Sangma.
“Balei ban da hap leit pynsngew sha ka Ministry of Home Affairs (MHA) halor kane ka jingjia. Balei phi donkam la ka jong ka aiñ halor kane ka jingjia. Ki briew leit sha kat ka jaka (Mukroh) ki don lut ha ka rekod. Ki ar tylli ki Sorkar ki donkam ban tip. Ki bor Pulit jong ki ar tylli ki jylla ruh ki hap ban tip,” u la ong bad bynrap, “hynrei balei ban da hap pynslem kai.”
“Dawa ïa ka Sorkar Assam ba kan shu aiti beit ïa kito kiba la shah kynnoh donkti bad ai ba ka aiñ jong ka ri kan leh la ka jong ka kamram,” la ong shuh shuh u Sangma.
“Ban ïoh ïa ka jingshahniah jong ki paidbah, ka Sorkar ka dei ban bthah ïa ki Pulit ban buddien ïa ka case baladep rejistar bad ba dei ban phah kem mardor ïa kiba donkti hynrei ym tang ban shu kut tang ha ka jingkren,” u la ong.
“Balei ban pynslem? Ki dei ban pynstet ïa kane ka kam. Pynmih da ka Arrest Warrant bad bthah ïa ka Sorkar Assam ban pynthikna ba kito kiba donkti ki dei ban shah kem bad shah aiti sha Meghalaya bad ai ba ka aiñ kan sa leh la ka jong ka kamram,” u la ong shuh shuh.
Haba pynrem jur ruh ïa ka rukom shimti jong ka Sorkar Meghalaya bad Assam halor kane ka jingjia ula ong, “nga pynrem jur ïa baroh ar tylli ki Sorkar. Kane kam dei satia ka rukom ban leh ïa kane ka kam. Kam dei satia ka jingpyni ïa ki kam hynrei ka dei tang ka jingkren da ka ktien.”
Halor ka jingkhang pyndonkam ïa ka mobile Internet, u Sangma u la takraiñ tyngeh ïa ka Sorkar MDA da kaba ong ba kane ka long ka jingknieh noh ïa ka hok jong ki paidbah nongshong shnong.
“Ki dei ban weng noh ïa ka jingkhang ïa ka mobile Internet khnang ba ngin dup lah ban pyndonkam katkum ka jingdonkam jong ngi kaba manla ka sngi khlem da khñiot ïa ki paidbah da kaba pynjari kum ïa kine ki jingpyrkhing kaba knieh noh ïa ka hok jong ki paidbah,” u la bynrap.
U la ong ruh ba ki jingpyrkhing ka Sorkar ïa ka hok jong ki paidbah ka pynpaw ba kam pat nang ban tem tang kum kine ki jingjia kiba rit kiba lah ban nang meh ding ar shah.
U Sangma uba la long teng u Myntri Rangbah ka Jylla ula takraiñ tyngeh ïa ka Sorkar Assam kaba la bthah ïa ki paidbah ban ym wan sha Meghalaya hadien ka jingjia ha Mukroh.
“Kumno ka Sorkar Assam ka lah ban ong ïa ki paidbah ban ym wan sha Meghalaya? Ka Sorkar Assam bad ka Sorkar Meghalaya ki dei ban ïakren paramaki ban pynthikna ba kam dei ban don satia kano kano ka jingpynthud ïa ka shongsuk shongsaiñ,” u la ong.
Shuh shuh u la ong ba ka jingjia ha ka shnong Mukroh kam dei satia ka jingjia na ka jingïashrut hapdeng ki Khasi bad ki Assamese hynrei ki jingleh jong ka Sorkar Assam bad Meghalaya ka pynmih pynban ïa ka jingmut kaba bakla.
U la ong ruh ba ka shongsuk shongsaiñ kam dei ban shah pynthuid bad kumno ban pynneh ïa ka shongsuk shongsaiñ ka dei ka jingkitkhlieh jong ka Sorkar.