‘Ka Sorkar MDA ka pynleit jingmut sha ki thaiñ ba sahdien ha ka Jylla’ ong u Conrad Sangma

Nongstoiñ, Nailar, 10: U Myntri Rangbah ka Jylla Conrad Kongkal Sangma ha ka sngi balang, u la buh mawnongrim ban tei ïa ka Integrated Development Complex ha Nongstoiñ, West Khasi Hills. Ha ka jingbuh mawnongrim jong u, la sakhi bad ïadon lang ruh da u Myntri ka Tnad C&RD Bah Hamletson Dohling bad u MLA ka thaiñ Bah Macmillan Byrsat.
Ha kane ka jingïalang, u Myntri Rangbah u la aiti ruh ïa ka song jingïarap da ka pisa sha ki nongrep tit oyster, kaba la mang na ka Meghalaya Mushroom Mission bad ki kynhun nongrep na ka FOCUS Programme.
Haba ai jingkren, u Myntri Rangbah u la ong ba ka Sorkar Jylla ka la pynleit jingmut bha sha ki thaiñ kiba sahdien jong ka Jylla bad ka la pyrshang ban pynthikna ba ki kam pynroi kin poi ha manla ki kyndong kynshrot jong ka Jylla. U la ong ruh ba ka Ophis Block ba thymmai kan pynthikna ïa ka jingai jingshakri kaba janai bha sha ki paidbah jong ka thaiñ.
Haba pynpaw ïa ka jingsngewkhia ba ki jingtei jong ka Sorkar Jylla ha ki jaka nongkyndong bad ha manla ki Block ki la jot, u Myntri Rangbah u la ong “Kane ka Sorkar ka la pyrshang ban tei thymmai ïa kine ki jingtei ba kin lah ai ïa ka jingshakri kaba janai sha ki paidbah. Ka Sorkar ka la dep ban mang haduh T.3 klur sha man kawei pa kawei ka Block ban tei ïa ki jingtei ba donkam ha baroh ki 46 tylli ki Block ba don ha ka Jylla”, u la bynrap.
Haba ban jur halor ka jingpyrshang jong ka Sorkar ban pynjanai ïa ka lad pynïasoh lyngba ki surok ha kylleng ki jaka jong ka Jylla, u la pyntip ba ka jingshna pynbha ïa ki surok ba kongsan ha West Khasi Hills kum ka surok Nongstoiñ-Maweit, Nongstoiñ-Wahkaji bad Nongstoiñ- Rambrai-Kyrshai ka la ïaid mynta. “Ka Sorkar ka la mang ïa ka pisa ba T.26.5 klur ban shna pynbha noh ïa baroh ki surok shnong kiba don ha sor Nongstoiñ” u la pyntip.
U Myntri Rangbah u la pyntip ba nalor ka jingtei ïa ki jingtei ba donkam, ka Sorkar ka la wanrah ruh ïa ki skhim ban kyntiew ïa ka ïoh ka kot ha ka imlang sahlang khamtam ïa ki kynthei bad ki nongrep. U la pyntip ha kane ka jingïalang ba ka Sorkar ka la dep ban pyllait palat ïa ka T.300 klur sha ki 35000 tylli ki Self Help Group (SHG) ha kine ki saw snem bala leit noh.
Haba pyntip ba haduh 4.5 lak ngut ki Kynthei ki la ïadon bynta ha ki SHG, u la ong ba ka jingpynshlur jong Sorkar ïa ka jingtreikam ki SHG, ka la lam sha ka jingkyntiew ïa ka kamai kajih jong ki Kynthei, kaba long kongsan bha sha ka jingkiew ka ïoh ka kot ka Jylla.
Nalor kane, u la pyntip ba ka sorkar ka la ai ïa ka jingïarap song pisa sha palat 18000 tylli ki kynhun nongrep hapoh ka FOCUS. U la ong ba lyngba ka FOCUS bad FOCUS plus programme, kan plie lynti ha ka ban ai jingkyrshan ïa ki nongrep bad ki kynhun pynmih mar rep ba kin ym don hapdeng ka jingkyrduh pisa.