Shillong, Jylliew 18 : Ka sorkar MDA kaba la dap 100 sngi dang shen ka la pyrshang ban trei na ka bynta ban wanrah ka bha ka miat bad ka jingmyntoi ïa ki paid nongshong shnong jongka jylla, ong u MLA ba rim ka Mawlai bad u Co – Chairman u bah P T Sawkmie haba ïakren bad ki nongthoh khubor.
“Ngi dei ban ïaroh ïa ka jingpyrshang jongka sorkar wat ha ine i 100 sngi ruh ka la leh hi ban shakri ïa ki paid nongshong shnong ka jylla. Ka la lah ban wanrah ïa ka G-20 Submit ha kane ka nongbah Shillong ha kaba ki delegates na kylleng ki ri bad napoh ka ri ki la wan ban ïashim bynta bad kaba sngewtynnad ka long ba ki la ïaroh ïa ka jingpynkhreh jongka sorkar ïa kane ka jingïalang jongki.
Nalor kata ka jingtrei ba shaid shaid da ki tnad sorkar bapher bapher ban pynitynnad ïa ka nongbah Shillong ba kan long ka smart city bad kumjuh ruh ïa ki constituency ba marjan.
Lada phai sha ka shongsuk shongsaiñ ruh ka sorkar ka la lah ban wanrah ïaka shongsuk shongsaiñ khamtam ba ka la lah ban wanrah ïa ka seng HNLC sha ka miej jingkren ïasuk. Ka jingshongsuk shongsaiñ ka jylla ka la ïoh ka jingïaroh na ki briew kiba na bar ba kane ka jia long namar ka jingïatrei lang ki paid nongshong shnong bad ka sorkar, ong u bah Sawkmie.
U la ong ka jingshongsuk ka long kaba donkam tam namar khlem ka jingshongsuk kam don ka roi ka par hynrei haba don ka jingshongsuk ka jylla ruh ka kiew ha baroh ki liang khamtam eh ha ka liang ki kam jngohkai pyrthei kaba ai kam ai jam ïa ki hajar ngut ki khun samla bad ki longkmie sha ki thaiñ nongkyndong.
Lada phai sha ka jingïapynbeit pud ruh kane ka sorkar ka la bteng ïa ka jingpynbeit pud ha kane ka Wat kaba Ar ba mynta ha kaba ki Regional Committee ki la ïa kynduh shaid shaid ban pyndep noh ïa kane ka kam. Nalor kata haba jia ki jingïapher jingmut ha ki thaiñ khappud khamtam kumba la jia dang shen ha Mukroh dei ka jingshim khia kloi ka sorkar ban ïakren mar mar ba ki bor ka sorkar Assam ba la lah ban tem ïa ki jingkulmar bad lah ban wanrah biang ïa ka jingshongsuk shongsaiñ.
Kumta u la ong ban ong ba kane ka sorkar MDA ka khlem pat leh ei ei ha ki 100 sngi ka long ka bym lah ban pdiang bad kaba la shu kynnoh khlem nongrim bad khlem da pynshong nongrim da kito kiba kwah ban kynthoh pyrshah beit ïa ka sorkar, pynkut u bah Sawkmie.
