Ka Sorkar MDA ka la shukor pylleñ pylleiñ ïa ki paidbah, kynnoh u Mukul Sangma

Mawkyrwat, ‘Nailur 24: U Nongïalam jong ka Liang Pyrshah u Mukul Sangma, uba long ruh u nongïalam jong ka Meghalaya Pradesh Trinamool Congress Party (MPTMC) u la kynthoh tyngeh ïa ka Sorkar MDA ba la ïalam da ka NPP ba “ka la thok im im peit peit ïa ki paidbah jong ka jylla Meghalaya”.
U Sangma u la takraiñ tyngeh ïa ka Sorkar MDA haba kren ha ka jingïalang paidbah ha Mawkyrwat, South West Khasi Hills Districrt ban pynkhlaiñ ïa ka Trimanool Congress ha Mawkyrwat Constituency hapoh ka jingïalam jong u Bah Sounder Strong Cajee kum u kyrtong u ban aireng ha ka elekshon 2023.
U Sangma u la kynthoh ruh ba ka jingleh jong ka Sorkar MDA ka la pynsngewsih ïa ki paidbah babun, la ka long ha kiba bun ki lad jingïarap ba ki paidbah ki dei ban ïoh kum ha ka liang ka koit ka khiah bad kiwei de.
U Mukul Sangma u la ong, mynba u dang long u Myntri Rangbah ka Jylla naduh u snem 2010 haduh u snem 2018 ka Sorkar ka ladep ban pruid dak ïa ki kam pynroi bad ki jingmyntoi jong u paidbah ha kiba bun ki bynta hynrei haduh mynta la jan kut sa ka pali jong kine ki nongïalam kiba thymmai ruh kim pat lah ban leh ei ei ruh em.
U la ong ruh ba ha kine ki sngi ki paidbah jong ka Jylla ki don hapdeng ki jingeh kiba bun khamtam eh ha kaba ïadei bad jingïapynbeit pud namar ka Sorkar MDA ha jaka ba kan ïarap ïa ki briew la jong ka kylla khongpong pynban da kaba die sha ka Assam.
Ha kaba ïadei bad ki projek napoh ka Basin ba la prat lynti ha ka por jong ka Sorkar u Mukul Sangma, u la ong, “mynta pat ki (Sorkar MDA) la sdang dei kawei pat ka bynta ban khrong pynban na ki paidbah ym shuh kaba ai sha ki paidbah.”
U la kynthoh ruh ha kaba ïadei bad ka wad kam wad jam, naduh u snem 2018 haduh mynta ka Sorkar MDA kam pat lah ban pyndap ïa ki post ba thylli.
“Balei ka shim por da ki snem namar wat ïa ki eksamin jong ki ruh ladep ban thoh?” la kynthoh u Mukul Sangma.
“Nga ladep ban pynsngew ruh wat hapoh ka Iingdorbar Thawaiñ hynrei na ka liang ka Sorkar kam shym la patiaw eiei ruh em. Nga la pynkynmaw ruh ha kaba ïadei bad ka jingthung kam nonghikai hynrei ïa kane ruh ka Sorkar haduh mynta ka leh klet. Kumta haei yn don ka jingshaniah ïa kum kane ka sorkar,” u la ong.
Ha kaba ïadei bad ka Pynursla Civil Sub Division ba la plie naduh u snem 2017, u la ong ba haduh mynta ym pat paw dak eiei ha jingdon jong ki tnad treikam kiba paka kumba la mait phang da ka Sorkar kaba mynshwa. U la ong ba ka Engineering College kaba don ha Sohra ruh haduh mynta ym pat lah ban pyndep bad kiwei de ki kam pynroi kiba la shu sah teng.
U la kynthoh ruh ba ka Sorkar MDA ka la sdang ban shukor ïa u paidbah hana ba kim don ka jingïatreilang bad ka BJP ne ki party riewlum kim don ka jingïatrieilang bad ka NPP pynban kine hi hapoh ki san snem kin ïatreilang bad mynta la jan dei ka por kine ki la sdang ban jingpyni dak ba ki la don ka jingïashrut iwei ïa iwei pat. “Kane ka la pynpaw shai ba ki thok im im peit ïa ki paidbah nongkyrshan”, u la bynrap.
Haba kren halor ka roi ka par lyngba ki surok ki ban pynïasoh na kawei ka jaka sha kawei pat, u Mukul Sangma u la pynpaw ka jingsngewsih namar naduh mynshwa shibun bah ki surok ki ban ai jingmyntoi ïa ki paidbah ladep ban priud dak kata naduh Shillong–Nongstoiñ sha Tura, ka Nongstoiñ–Rambrai sha Kyrshai haduh Assam ym pat lah ban pynwan dur ha ka rukom kaba dei khamtam eh ïa ka surok Shillong–Mawphlang–Weiloi–Mawkyrwat–Ranikor sha Baghmara ha kaba kane ka surok ka la shu jah rngai noh.
“Ka Trinamool Congress ha kane ka kynti ka don ha ka ïa ka jingthmu ban pynneh ïa ka jinglaitluid jong ki paidbah naduh ka jingmane Blei, ban trei ban ktah, bad kiwei de ki kam kiba ki paidbah ki ïoh jingmyntoi,” u la ong.
“Ha kine ki sngi ka jingtih bad shalan dewïong ha Jylla ka la khang lut hynrei ïa lade (ki Myntri ka Sorkar MDA) ki don da ki trok ban shalan ïa u dewïong. Hato kane kam dei ka kam ba ki thok pylleiñ pylleiñ ïa u paidbah, ïa u duk u suk, u sem shilliang u kup shilliang?” la kynthoh u Mukul Sangma.
“Kane ka dei ka por kaba kongsan eh ba kum ki paidbah kin ai ka jingïatreilang bad kane ka Meghalaya Pradesh Trinamul Congress Party khnang ba ki jingthmu kin urlong bad ki jingkylla kiba bun kin wan ha ka Jylla Meghalaya baroh kawei,” ula ong.