Ka sorkar MDA ka dei suri kup snieh langbrot kam ñiewkor jaidbynriew shuh : Dr Mukul

Shillong, Iaiong 13 : U Nongïalam ka All India Trinamool Congress (AITC) u Dr Mukul Sangma ula ther tyngeh bad kynnoh ba kane ka sorkar MDA ba la ïalam da ka NPP ka dei ka sorkar kaba kup ïa ka dur jong u suri kup snieh langbrot namar kam niewkor shuh ïa la ki jong ki briew bad kum ka Party kan ïeng ban pyrshah haduh ba kut ïa ka Memorandum of Understanding (MoU) ba la ïasoi bad ka Assam halor ki 6 tylli ki jaka napdeng ki 12 kiba ïa kajia.
“ Kane ka sorkar ka long thik kum u suri kum snieh langbrot, namar kam don ka jingkitkhlieh bad shim khia ban ïada ïa la ki jong ki briew ne ïa ki Jaidbynriew lajong” ong u Dr Mukul.
Kane ka jingther kylla sa u Dr Mukul ka long tang hadien shisngi ba u Myntri Rangbah u Conrad K Sangma ula tei pop ha u Dr Mukul ha kaba ïadei bad ki shnong kiba hap sha Assam da kaba kynnoh ba ia ka list ba la ai sha ka Assam ha u 2011 da u Dr Mukul la ai tang 23 tylli ki shnong ba ïakajia bad lyngba ki jingïakren ka Meghalaya ka la ioh 21 na kitei ki 23.
U Dr Mukul ula ong “ Kat kum ka jingsngewthuh jong nga ka dei ka Assam kaba la pynkhreh ïa ka list kino ki shnong ban leit sha Meghalaya bad kino ki ban wan ne neh sha ka Assam bad kine ki jong ngi ki shu soi beit la ka soi” “Hato phi la ïoh ïa ka kopi ba la pynkhreh da ka sorkar Meghalaya ban pynpaw ba ki khlem leit thylli sha kino kino ki jingïalang? “ Kaei kaba la pynkhreh da ka Assam hapoh ka jingïalam jong u Myntri Rangbah jongka uba shalak khlieh u Himanta Biswa Sarma, u ba la tip lut shaphang kine ki jaka bad kwah ban pynbeit ïa u pud katba kine ki briew ki dang don ha ka shuki khnang ba kan long kaba suk ban pynbiej ïa ki” ong biang u Dr Mukul.
Une u Myntri Rangbah ba rim ka jylla u la pynkynmaw ruh kumno ba ka Assam ka pynslem ïa ka kam ïa pynbeit bud bad ka Meghalaya ha ka por ba u don ha ka bor halor kine ki 12 tylli ki jaka ha u snem 2011 ka daw ka long ba ki (Assam) ki tip shai ba kin ym lah ban pynbiej ne ban leh da ki buit poh namar ha kato ka por ka sorkar ka la rai ba kan ym ai da lei lei ruh ïa ki shnong kiba hap hapoh ka Meghalaya sha ka Assam.
U Dr Mukul u la ong ba ki don ar tylli kiei kiei halor kane ka kam, ka lah ban long ba ka la don lypa ka jingïapynbeit da ka sorkar ban ïa pynbeit ïa u pud wat la ka long pyrshah ïa kamon ki paidbah bad ai jingmyntoi ïaka Assam lane ka lah ban long ba kane ka sorkar bad ki nongïalam jongka kim tip shai shaphang kane ka kam ïa pynbeit pud ne ïa u pud u sam la jong. “ Ka lah ban long ba kane ka sorkar ba ki nongïalam jongka kim sngewthuh ei ei shaphang kane kam pynbeit pud ne ka lah ba long ba ki ar ngut ki myntri rangbah ki la dep ïa rai lypa ban ai beit ïa ki jaka sha ka Assam” ong u Dr Mukul.
Halor ki jingkam jong u Conrad ba tang ar tylli ki shnong kiba leit sha Assam na ki 23 tylli u Dr Mukul ula ong ba wat ïa ka Joypur ruh u ( Conrad) ula dep aiti sha ka Assam. U la ong kawei dei ban kynmaw ba ki don ki shnong kiba dei ki juh ki kyrteng kiba don ha Assam bad Meghalaya kum ka Joypur ka dei kaba hap hapoh Meghalaya bad ka don sa kawei ka Joypur kaba hap ha Assam hynrei ïa kane ka shnong kaba hap ha Meghalaya ruh la ai noh sha ka Assam.
Ka Malchapara kaba dei ka shnong ha Meghalaya la ai sha ka Assam. Ka Salbari kaba dei ka shnong hapoh Meghalaya la ai sha Assam. ïa ka khlhaw Gizang Reserve Forest kaba 8.7 Sq.Km la aiti sha ka Assam. Kane ka jaka ka dei kaba hap hapoh u pud u sam ka United Khasi Jaintia District Council hynrei mynta la aiti lut shaka Assam.
U Dr Mukul u la ong ba ka AITC kan ïeng pyrshah jur beit ïa ka MoU ryngkat bad ki paidbah khnang ba kan ym urlong da leilei ruh. U la ong ba kine ki shnong ki bym don haka list ki dei kiba la thikna ba kim dei kiba ïakajia bad ki hap ruh hapoh u pud ka Meghalaya hynrei mynta ïa kita ki shnong bym ïakajia la aiti beit sha ka Assam.